अनलाइन डबली
काठमाडौँ । मधेस प्रदेशको स्वास्थ्य तथा जनसंख्या मन्त्रालयले सिटी स्क्यान खरिद प्रक्रियाबारे छानविन गर्न तीन सदस्यीय समिति गठन गरेको छ । विवादित मेडिकल सप्लायर विशाल पण्डितले सेटिङमा बोलपत्र आह्वान गर्न लगाएको कुरा सडकदेखि लेखा समितिसम्म पुगेपछि मन्त्रालयले छानविन समिति गठन गठन गरेको हो ।
मन्त्रालयले डा. इन्द्रजित रजकको संयोजकत्वमा तीन सदस्यीय समिति गठन गरेको छ । जसमा बायोमेडिकल इन्जिनियर शैलेन्द्र यादव र मन्त्रालयका शाखा अधिकृत रविन्द्र यादव सदस्य रहेका छन् ।
समितिका संयोजक डा. रजकले अनलाइन डबलीसँग आफूहरुले पत्राचार गर्न सुरु गरेको र विस्तृत अध्ययन आइतबारबाट गर्ने बताए ।
“बायोमेडिकल इन्जिनियर अन्य काममा व्यस्त हुनुहुन्छ । उहाँलाई हामीले बोलाइसकेका छौं, अब आइतबारबाट यो विषयको विस्तृत अध्ययन सुरु गर्छौं” डा. रजकले भने । उनले मन्त्रालयले समय नतोकेकोले आफूहरुले योसँग सम्बन्धी सबै विषयहरुको अध्ययन गर्ने जानकारी दिए ।
मन्त्रालय मातहतको स्वास्थ्य आपूर्ती व्यवस्थापन केन्द्रले फागुन १० गते १२८ स्लाइस सिटी स्क्यान खरिद गर्न टेण्डर आह्वान गरेको थियो । खरिद ऐन विपरित पण्डित, मन्त्री विरेन्द्र सिंह, निमित्त निर्देशक डा. मनीष पाण्डे र परामर्शदाता बन्दना मिश्रको मिलेमतोमा स्पेक लक गरेर टेण्डर आह्वान गरेको आरोप लागेको छ ।
उक्त विषय प्रदेशसभा अन्तरगतको सार्वजनिक लेखा समितिमा समेत पुगेको छ । समितिले पाण्डे र मिश्रलाई बैठकमा बोलाएर बयन समेत लगेको थियो । दुबै जनाले दिएको बयन चित्त नबुझेको समितिले निष्कर्ष निकालेको थियो ।
सिरहा र सर्लाहीको लागि रुमसेटअपसहित सिटी स्क्यान मेसिन खरिद प्रक्रियामा पण्डित एजेन्ट रहेको फिलिप्स कम्पनीसँग मिल्ने खरिद मापदण्ड बनाएर टेण्डर आह्वान गरिएको थियो । पण्डितको कम्पनीले मात्रै पाउन एनसिबी टेण्डर निकालिएको थियो ।
सामान्यः सिटी स्क्यान र एमआरआई जस्ता मेसिन खरिद गर्दा आईबिसी टेण्डर निकाल्ने गरिन्छ । पण्डितको हस्पिटेक इन्टरप्राइजेज मात्रै प्रतिस्पर्धामा आउन सक्नेगरी स्पेसिफिकेशन बनाएर एनबिसी टेण्डर आह्वान गरेपछि विरोध भएको थियो ।
मेडिकल व्यवसायी नारायण कार्कीले उक्त प्रकरण छानबिनको लागि मुख्यमन्त्री कार्यालय, अख्तियार दुरुपयोग अनुसन्धान आयोग र सार्वजनिक लेखा समितिमा उजुरी दिएका थिए ।
यो पनि पढ्नुहोस्
