अनलाइन डबली
काठमाडौँ । विवादित मेडिकल सप्लायर विशाल पण्डितले आफूविरुद्धका समाचार रोक्न पत्रकारलाई मिलाउन भन्दै मोटो रकम पठाएको खुलासा भएको छ । मधेस प्रदेशको आपूर्ती व्यवस्थापन केन्द्रले 128 Slice CT scan खरिद गर्न फागुन १० गते आह्वान गरेको 22 feb.2024 IFB NO: MP/PHMC/NCB/GOODS-13/2080-81 टेण्डरमा स्पेकलक गरेको अनलाइन डबलीले पहिलोपटक खुलासा गरेको थियो ।
उक्त सिटी स्क्यान खरिदको लागि सूचना प्रकाशित अघिनै पण्डितले कर्मचारीसँग मिलेर आफू एजेन्ट रहेको फिलिप्स कम्पनीसँग मात्रै मिल्ने गरी खरिद मापदण्ड बनाउन लगाएका थिए । पण्डितको उक्त सेटिङ सार्वजनिक भएपछि सामाचार रोक्न भन्दै पैसाको बिटो पठाएका हुन् ।
“स्थानीय र केन्द्रीय संचारमाध्यममा समाचार आउन थालेपछि विशाल पण्डितले पत्रकारलाई मिलाउनु पर्यो भन्दै पहिलो चरणमा केही रकम पठाउनु भयो । माग गरिएको भन्दा कम चार लाख पहिलो चरणमा पत्रकारलाई मिलाउन भन्दै पैसा पठाइएको सूचना हामीसँग छ” स्रोतले भन्यो ।
तर, मिडिया र पत्रकारसम्म उक्त रकम पुगेनपुगेको खुलेको छैन । स्रोत अगाडि भन्छ, “उक्त पैसा मधेस प्रदेशमा पुगेको हो तर कुन मिडिया र कति पत्रकारलाई बाँडियो भन्ने पत्ता लागेको छैन । यदि उक्त रकम बाँडिएको भएपनि पण्डितको उद्देश्य भने पूरा हुन सकेन, संचारमाध्यमहरुले सत्य कुरा सार्वजनिक गरिरहेका छन् ।”
केन्द्रले सर्लाही र सिरहामा ‘रुमसहितको सिटी स्क्यान’ जडानको लागि टेण्डर आह्वान गरेको थियो । पण्डितले उक्त टेन्डरमा स्पेक लक गर्न तयार नभएपछि निर्देशक र बायोमेडिकल इन्जिनियरको सरुवा समेत गराएका थिए ।
प्रदेशका स्वास्थ्य मन्त्री विरेन्द्र सिंहसँग मिलेर पण्डितले केन्द्रका तत्कालिन निमित्त निर्देशक नागेन्द्र यादव र बायोमेडिकल इन्जिनियर शैलेन्द्र यादवलाई सरुवा गराएका थिए । मन्त्रीले नागेन्द्रका ठाउँमा मधेश स्वास्थ्य विज्ञान प्रतिष्ठान जनकपुरमा कार्यरत डा. मनिष पाण्डेलाई ल्याएका छन् भने नागेन्द्रको स्थानमा पण्डितकी पूर्वकर्मचारी मिश्रा ।
पण्डित एजेन्ट रहेको फिलिप्स कम्पनीको फिचारसँग मिल्ने गरी खरिद मापदण्ड नबनाएकै कारण नागेन्द्र र शैलेन्द्रको सरुवा गरिएको चर्चा यसअघि नै मधेस हुँदै काठमाडौँसम्म पुगेको थियो । टेण्डर आह्वानपछि उक्त कुराको पुष्टि भएको छ ।
दुईवटा मेसिन र रुम सेटअपसहित बढीमा १० करोडसम्म पर्ने देखिएपनि स्पेकलक गरेर त्यसको दोब्बर लागत मूल्य राखिएपछि यो विषय अख्तियार दुरुपयोग अनुसन्धान आयोगसम्म पुगेको छ ।
सप्लायर्स नारायण कार्कीले उक्त प्रकरणको छानविनको लागि मुख्यमन्त्री कार्यालयमा यसअघि उजुरी दिइसकेका छन् । उनले अख्तियार दुरुपयोग अनुसन्धान आयोग र प्रदेशसभा अन्तरगतको सार्वजनिक लेखा समितिमा समेत छानविनका लागि उजुरी दिएका छन् । कार्कीले सार्वजनिक खरिद ऐन विपरित स्पेकलक गर्न संलग्न कर्मचारीमाथि कारवाहीको माग समेत गरेका छन् ।
यो प्रकरणमा मधेस प्रदेशका स्वास्थ्यमन्त्री सिंहको पण्डितलाई साथ रहेको आरोप लागेको छ । तर, अहिलेसम्म मन्त्री सिंहले यसबारे धारणा सार्वजनिक गरेका छैनन् ।
पण्डितले हस्पिटेक इन्टरप्राइजेज र लाइफलाइन ट्रेड इन्टरनेसनल कम्पनीमार्फत सेटिङमा स्पेकलक गरेर स्वास्थ्य सामाग्री आपूर्ती गर्दै आएको आरोप लाग्दै आएको छ ।
यो पनि पढ्नुहोस्
