अनलाइन डबली
काठमाडौँ । विवादित मेडिकल सप्लायर्स विशाल पण्डितले ‘सेटिङ’ मा सिटी स्क्यान खरिद गर्न लागेको भन्दै उजुरी परेको छ ।
मधेस प्रदेश स्वास्थ्य आपूर्ती व्यवस्थापन केन्द्रका निमित्त मनिष पाण्डे र बायोमेड इन्जिनियर बन्दना मिश्रले खरिद ऐन विपरित एउटै मात्र कम्पनीको लागि स्पेसिफिकेसन बनाएको भन्दै विभागीय कारवाही गर्न माग समेत गरिएको छ ।
मेडिकल सप्लायर्स नारायण कार्कीले दिएको उजुरीमा पाण्डे र मिश्रलाई कारवाही गर्न छानविन समिति गठनको माग समेत गरेका छन् ।
केन्द्रले फागुन १० गते सर्लाही र सिरहामा ‘रुमसहितको सिटी स्क्यान’ जडानको लागि टेण्डर आह्वान गरेको थियो ।
पण्डितको कम्पनीले मात्रै पाउनेगरी स्पेसिफिकेशन बनाएको समाचार अनलाइन डबलीमा प्रकाशित भएको थियो ।
‘माफिया’ पण्डितले आफ्नो कम्पनीले पाउने गरी स्पेक बनाउन तयार नभएपछि स्वास्थ्य आपूर्ती व्यवस्थापन केन्द्रमा स्थायी दरबन्दी भएका बायोमेड इन्जिनियरलाई सुरुवा गरेर करारमा नियुक्त गरिएकी बन्दना मिश्रलाई खरिद मापदण्ड बनाउन लगाएको बताइएको छ ।
‘सेटिङ’ मा १० करोड कमिसन खानेगरी पण्डितको हस्पिटेक प्रा.लि.सँग मिल्ने मापदण्ड बनाएर २० करोडको सिटी स्क्यान मेसिन खरिद तथा जडान गर्ने तयारी भइरहेको बेला उजुरी परेको हो ।
