काठमाडौं । कोरोना महामारीमा स्वास्थ्य सामग्री तोकिएको समयमा आपूर्ति नगर्ने ओम सर्जिकल र मेडिकन्सर्नलाई स्वास्थ्य सेवा विभागले तेस्रो पटक मौका दिएको छ । स्वास्थ्य सेवा विभागले ओम्नी ग्रुपलाई समयमा सामान नबुझाएको भन्दै २०७६ चैत २० मा कालोसूचीमा राख्न सार्वजनिक खरिद अनुगमन कार्यालयलाई सिफारिस गरेको थियो । तर टेण्डर सम्झौतामा उल्लेख गरेको मितिमा सामान नबुझाउने ओम सर्जिकल र मेडिकन्सर्नलाई भने विभागले कालोसूचीमा राख्न प्रक्रिया नै अगाडि नबढाई पटकपटक सामान बुझाउन म्यादथप गरी सहुलियत दिएको छ । तरपनि विहीबार विहान यो समाचार तयार पार्दासम्म ओम सर्जिकल र मेडि कन्सर्नले सम्झौताअनुसारको स्वास्थ्य सामाग्री विभागलाई बुझाएको छैन ।
ओम र मेडिकन्सर्नलार्ई सामान बुझाउन दोस्रो पटक आइतबारसम्म दिएको समयसीमा पनि सकिएपछि फेरि म्यादथप गरी बैशाख २१ सम्म बुझाउन भनियो । उनीहरुले बैशाख २१ मा पनि सामान बुझाएनन् । दोस्रो पटकको समय बैशाख २१ सम्म समय दिंदा पनि उनीहरुले नबुझाएपछि पनि विभागले उनीहरुलाई कालोसूचीमा राखेन । उनीहरुलाई विभागले पुनः म्यादथप गरी तेस्रो पटक मौका दिएको छ । ओम सर्जिकलका संचालक रामशरण भण्डारीसँग मिलेमतो भएकाले स्वास्थ्य सेवा विभागका महानिर्देशक महेन्द्र श्रेष्ठ, ब्यवस्थापन महाशाखाका प्रमुख भोगेन्द्र डोटेल, आपूर्ति शाखा प्रमुख चुडामणि भण्डारी ओम र मेडिकन्सर्नलाई कालोसूचीमा नराखी पटक पटक म्यादथप गरी सामान बुझाउन छुट दिएका छन् । ओम्नीको स्वास्थ्य सामग्री बुझाउने समय हुँदाहुँदै कालोसूचीमा राख्ने विभागले ओम र मेडिकन्सर्नलाई टेण्डरको समयसीमा सकिएपछि भने ३ पटक म्यादथप गरी सहुलियत दिएको छ ।
विभागले ओमका लागि एउटा र ओम्नीका लागि अर्को कानुन लागू गर्न खोजेकाले पनि भ्रष्टाचार भएको देखिन्छ । विभागको यो समूहले नै ओम्नीको सूचना लिक गरी उसलाई कालोसूचीमा राखेर आफ्नो सेटिङ भएका ओम र मेडिकन्सर्नलाई टेण्डर हाल्न लगाई ठेक्का दिएको खुलेको छ ।
पीपीई, थर्मल गन, एन ९५ मास्क, ग्लोब, आरडीटी किट लगायतका स्वास्थ्य सामग्री आपूर्तिको ठेक्का पाएका ओम सर्जिकल र मेडिकन्सर्नले अन्तिम मितिसम्म सामान नबुझाउँदा पनि विभागले कारबाही गर्न आवश्यक नठान्नुको कारण ओमसँगको साँठगाठँ नै हो । ओम र मेडिकन्सर्नले स्वास्थ्य सेवा विभागलाई बुझाउन ल्याएको सामान बजारमा कालोबजारीमा बिक्री गरेका छन् ।
ओमले त इटहरी, बुटवल र धनगढीमा पठाएर कालोबजारी गरेको आरोप छ । उसले त्रिपृुरेश्वरस्थित सर्जिकलबाट पनि ३ हजारको थर्मोगन ९ हजार र २ ७० रुपैयाँको एन ९५ मास्क ३८० मा थोकमा बिक्री गरेको बिषयमा केमसनको बैठकमै विवाद भएको थियो । विभागलाई बुझाउन ल्याएको सामान त्रिपुरेश्वरस्थित ओम सर्जिकलबाट कालोबजारी भएकोबारेमा मिडियाबाजी भएपछि रामशरण भण्डारीले आफ्ना भाइ दलबहादुर भण्डारीको भण्डारी सर्जिकलबाट स्वास्थ्य सामग्र्री बितरण गर्दैआएका छन् ।
ओमले बेच्यो नक्कली पीपीई
ओम सर्जिकलले विश्व स्वास्थ्य संगठनले तोकेको गुणस्तर अनुरुपको भन्दै नक्कली पीपीई बिक्री गरेको आरोप छ । एक सर्जिकल संचालकका अनुसार डब्लुएचओ हुँदै होइन तर उसले डब्लुएचओ प्रुफ भन्दै बिक्री गरिरहेको छ । १ हजार मूल्यको पीपीईलाई डब्लुएचओ भन्दै १ हजार ९ सय रुपैयाँमा बिक्री गरिरहेको छ । स्यानिटाइजर भ्याट नतिरी ल्याएर अहिले भ्याट जोडेर बिक्री गरिरहेको छ । स्यानिटाइजर, मास्क र थर्मोगन ओमले सरकारले दिएको भ्याट फ्री सुविधामा ल्याए । सरकारले बैशाख १५ गतेसम्म स्वास्थ्य सामग्री आयात गर्दा भ्याटछुट दिएको थियो । ओम र मेडिकन्सर्नले बैशाख १५ अगाडि ल्याएका स्वास्थ्य सामग्री अहिले भ्याट जोडेर बिक्री गर्दैआएका छन् । यसमा राजस्व अनुसन्धान विभागले छानबिन गरे सबै खुलासा हुने सर्जिकल संचालक बताएको नेपालफेस अनलाइनले समाचार लेखेको छ ।
