काठमाडौँ । सरकारसँग गरेको सम्झौताअनुसार चीनबाट स्वास्थ्य सामाग्री ल्याएका तीनवटा कम्पनीले बजारमा कालोबजारी गरेर बिक्री गरिरहेको पाइएको छ । स्वास्थ्य सेवा विभागलाई दिने अन्तिम समय बैशाख १९ गते शनिबार सकिएको छ । तर, तीनवटै कम्पनीले सम्झौताअनुसारको सामाग्री विभागलाई दिएका छैनन् ।
चौतर्फी दवाव र विरोधलाई थेग्न नसकेर सरकारले ओम्नी ग्रुपसँग गलत नियतले गरेको सम्झोता रद्द गरेको थियो । त्यसपछि पुनः विभागले चैत्र २३ गते नयाँ टेण्डर निकालेर ३० गते खोलेको थियो । विभागले दोस्रो चरणमा ओम सर्जिकल, हाम्रो मेडि कन्सर्न र लुम्बिनी हेल्थ केयरसँग सरकारले सम्झौता गरेको थियो ।
सम्झौतामा दुई हप्ताभित्र सबै सामान दिने भनिएको तर शनिबारसम्म पनि नदिएको स्वास्थ्य सेवा विभागको व्यवस्थापन महाशाखाका निर्देशक भोगेन्द्र डोटेलले शनिबार अनलाइन डबलीसँग बताए । अन्तिम मिति शुक्रबार सकिएको तर आज बिदा भएकोले आइतबारसम्म पर्खिने डोटेलले बताए ।
सरकारलाई दिने भनेर चीनबाट ल्याइएको स्वास्थ्य सामाग्री ओम सर्जिकल रातारात धनगढी र बुटवल पुर्याएको छ । धनगढीमा हंशराज खड्काले संचालन गरेको ओम सर्जिकल र सोही नामको बुटवलमा रहेको कम्पनीले सरकारलाई दिन चीनबाट ल्याएको स्वास्थ्य सामाग्री रातारात लिएका हुन् ।
विभागसँग भएको सम्झौतापछि ओम सर्जिकलले तीनपटक चीनबाट स्वास्थ्य सामाग्री ल्याइसकेको छ । तर, सम्झौताअनुसारको सामान विभागलाई दिएको छैन ।
यसमा रसायन तथा मेडिकल आपूर्ति संघ नेपालमा आवद्ध ३६ जना व्यवसायीहरुले चीनबाट ल्याएको सामान बाँडिचुडी कालोबजारीमा बेचिरहेका छन् । एक व्यवसायीका अनुसार उनीहरुले रकम जम्मा गर्ने त्यहीअनुसार ओम सर्जिकलले चीनबाट सामान ल्याइरहेको छ । तीनपटक गरी ओम सर्जिकलले मात्रै करिब ५० करोड बराबारको स्वास्थ्या सामाग्री भित्र्याउँदा समेत सम्झौताअनुसारको सामान नदिने भनेको सरासर बदमासी नै हो ।
ओम सर्जिकलले सम्झौताको दुरुपयोग गरिएको व्यवसायीका आरोप छ । “जति पटक सामान ल्याउन गयो त्यति पटक विभागसँग भएको सम्झौता देखाएर भन्सार र विमान .चाटर्डमा सुविधा लिने तर सामान बजारमा आफू खुशी बेच्नु सरासर अपराध हो । तर यो देशमा कसले सुन्ने ?” एक व्यवसायीले अनलाइन डबलीसँग भने ।
सरकारले समयमै सामान उपलब्ध गराउन नसक्ने देखिएको भन्दै ओम्नीसँगको सम्झौता रद्द गरेको थियो । सरकारले सम्झौता रद्द गर्दा ओम्नीले दोस्रो पटकलाई पाएको समय पार भएको थिएन । तर दोस्रो सम्झौताले समय सीमा पार गरिसकेको छ ।
यो पनि
१. सम्झौताअनुसार चीनबाट ल्याएको स्वास्थ्य सामाग्री सरकारलाई दिइएन, बजारमा महंगोमा बेच्दै निजि कम्पनी
