अनलाइन डबली
काठमाडौँ । नेकपा (एकीकृत माओवादी) ले मूल्यवृद्धि तथा कालोबजारी नियन्त्रण नगरे मन्त्रीहरुलाई जनकारवाही गर्ने घोषणा गरेको छ । शनिबार संवाद डबलीमा पत्रकार सम्मेलनको आयोजना गरेर एकीकृत माओवादीले मन्त्रीहरुसँगै नेपाल आयल निगमका कार्यकारी निर्देशक, कृतिम अभाव सिर्जना गर्ने विचौलिया, भ्रष्टाचारीलाई जनकारवाहीस्वरुप कालोमोसा दल्ने घोषणा गरेको हो ।
एकीकृत माओवादीका अध्यक्ष माणिक लामाले आफ्नो पार्टीले महंगी, कालोबजारी, बलात्कारी, मिटर ब्याज नियन्त्रण गर्न सरकारसँग माग गरेको जानकारी दिए । उनले जनताको दैनिक जीवनसँग जोडिएका मागहरु आफूहरुले उठाएको भन्दै पूरा गर्न आग्रह समेत गरे ।
पत्रकार सम्मेलनमा एमसीसी सरकारले जबरजस्त संसदबाट पास गरेर राजपत्रमा प्रकाशित गरेको बताउँदै राष्ट्रहितमा नभएको भन्दै लागु नगर्न सरकारसँग माग गरेको छ । त्यस्तै, आपनो पार्टीसहितको चौतर्फी विरोधका कारण सरकार एसपीपीबाट सरकार पछि हटेको बताउँदै विरोध मत्थर भएपछि पुनः लागु गर्न सक्ने भन्दै खबरदारी राखी राख्ने प्रेस विज्ञप्तिमा उल्लेख छ । उसले जनतालाई खबरदारीमा उत्रिन अपील समेत गरेको छ ।
कार्यक्रममा प्रवक्ता जन्जिर शाहीले सरकारले संसदीय समितिले पेट्रोलियम पदार्थको ५० प्रतिशत कर फिर्ता लिन दिएको निर्देशन पूरा नगरेको बताए । पेट्रोलियम पदार्थको मूल्यसँगै हरेक सेवा र बस्तुको मूल्य घटबढ हुने भन्दै उनले अझै थप कर फिर्ता लिएर जनतालाई राहत दिनुपर्ने बताए ।
त्यसैगरी माओवादीले नेपाली नागरिकको गोपनियता, राष्ट्रिय स्वाधिनता, नेपाली आर्ट मजदूरको रोजीरोटी खोस्ने र ठूलो आर्थिक चलखेलमा लागु गर्न खोजिएको इम्बोस्ड नम्बर प्लेट लागु नगर्न सरकारसँग माग गरेको छ । त्यस्तै, बढ्दै गएको भ्रष्टाचार, यौन हिंसाका घटना, मिटर ब्याजीविरुद्ध कडा कदम चाल्न समेत सरकारसँग माग गरेको बताउँदै प्रवक्ता शाहीले बेवास्ता गरे बाध्य भएर जनकारवाही गर्ने चेतावनी समेत दिए ।
पहिलो चरणमा, ध्यानाकर्षणपत्र बुझाउने, वाइलिङ, पोष्टरिङ, भित्तेलेख, पर्चा, पोष्टर लगायतका प्रचारात्मक गतिविधिहरु गर्ने, दोस्रो चरणमा, धर्ना, मशाल जुलुस, एक घण्टे चक्का जाम, कोणसभा तथा विरोधसभा र तेस्रो चरणमा मन्त्रीहरु र नेपाल आयल निगमका प्रमुख, कृतिम अभाव खडा गर्ने विचौलिया तथा कालोबजारीया, बलात्कारी र भ्रष्टाचारी, मिटर ब्याजीमाथि जनकारवाही गर्ने विज्ञप्तिमा उल्लेख छ ।
साे अबसरमा पार्टीकाे मुखपत्र राताेयात्रा डटकम अनलाइानकाे शभारम्भ गरिएकाे थियाे । पार्टी अध्यक्ष लामाले नयाँ अनलाइनले देश र जनताका आवाजलाइ बुलल्द गर्ने बताए ।
