अनलाइन डबली
धनगढी । डडेल्धुरा अस्पतालका अध्यक्ष करुणाकर ओझाले अख्तियार दुरुपयोग अनुसन्धान आयोगलाई अटेर गरेर आफू खुशी कार्य गरिरहेका छन् ।
स्वास्थ्य शिविरको नाममा पेश्की रकम लिएको लगायतका विषयमा आयोगले छानबिन गरिरहेको छ । तर, यता अध्यक्ष ओझाले थप विवादित कार्य धमाधम गरिरहेका छन् ।
अख्तियारको कञ्चनपुर कार्यालयले गएको साउन १५ गते पत्र पठाएर अक्सिन प्लान्ट खरिद, औषधिको स्वीकृत बजेट, कार्यक्रम विधि, खरिद रकमलगायतका कागजात पठाउन भनेको थियो ।
त्यसैगरी २०७९÷०८० को कर्मचारी पदपुर्ती विवरण, लिखित परीक्षाको नतिजा, पदपुर्ती समितिको निर्णय र सम्झौताको प्रतिलिपी, हाडजोर्नीको अप्रेसन गर्ने टेबुल खरिद सम्बन्धी सम्पूर्ण विवरण, जेनेरेटर खरिदसँग सम्बन्धीत सम्पूर्ण कागजात मागेको थियो ।
यो विषयमा छानबिन भइरहेको बेला अध्यक्ष ओझाले अहिले फेरि आफू खुशी कर्मचारी भर्ना, विना डेण्डर फर्निचर र औषधि खरिद गरेका छन् ।
अस्पताल स्रोतका अनुसार अध्यक्ष ओझाले आफ्ना र नेपाली काँग्रेसको एक पक्षका नेताका आफन्त गरी तीन दर्जन कर्मचारी नियुक्त गरेका छन् । ओझाले नेपाली काँग्रेसकी प्रदेश सांसद सरस्वाती खड्काका आफन्त बढी भर्ना गरेका छन् ।
त्यसैगरी विना कोटेशन वा टेण्डरमा खरिद गरिएका फर्निचर तथा डेकुरेशनका समानहरुको बिल अस्पताल प्रशासनमा पेश गरेका छन् । त्यस्तै, एक करोड बराबरको औषधि खरिद बील पनि पास गरेर भुक्तानीको लागि दवाव दिइरहेका छन् । यसमा केही बील फर्जी भएको अस्पताल स्रोतले बतायो ।
अध्यक्ष ओझाले सांसद खड्ककालाई आइफोन पनि किनिदिएका छन् । त्यसको भुक्तानी गर्न पनि चर्को दबाब दिइरहेका छन् । तर, अख्तियारले यसअघिका विषयमा छानबिन गरिरहेकाले अस्पताल प्रशासनले अध्यक्ष ओझाले पेश गरेका बील पास गर्न मानिरहेको छैन ।
पेश्की रकम लिन नपाउने नियम हुँदाहुँदै २० लाख रकम पेश्की बुझेपछि अध्यक्ष ओझा अख्तियारको छानबिनमा परेका थिए । अख्तियारले छानबिन गरिरहेको बेला नै थप अख्तियारी दुरुपयोग गर्दै ओझाले कर्मचारी नियुक्त र खरिद सम्बन्धी कामहरु धमाधम गरिरहेका छन् ।
संघीय सरकारको मातहतमा रहेको सुदूरपश्चिम प्रदेशका पहाडी जिल्लाको एकमात्र यस अस्पताललाई नागरिकको सेवा दिनभन्दा पनि निश्चित व्यक्तिको स्वार्थ पूरा गर्ने थलो बनिरहेको स्थानीयको गुनासो छ । यस एकपछि अर्को विथितिका चाङ बढ्दै गएका छन् ।
यस विषयमा बुझ्न हामीले अस्तालका मेसु डा. सन्तोष गुप्तासँग सम्पर्क गरेका थियौँ । उनले आफू केही दिन बाहिर भएकोले जानकारी नभएको बताए । आफू अस्पताल पुगेर मात्र बताउन सक्ने डा. गुप्ताले प्रतिक्रिया दिए ।
यस्तो छ अख्तियारले पठाएको पत्रः
माओवादी कोटाबाट नियुक्ती पाएका अध्यक्ष ओझा गएका स्थानीय तहको चुनावमा नेपाली काँग्रेसमा प्रवेश गरेका थिए । उनी हाल काँग्रेस सभापति शेरबहादुर देउवा पन्ती आरजु राणा निकट मानिन्छन् ।
माओवादीबाट काँग्रेसमा प्रवेश गरेका ओझाले आरजुसँग नजिक हुँदै लामो समयदेखि योगदान गरेका पुराना नेता कार्यकर्तालाई पाखा लगाउँदै आफ्नो स्वार्थ पूरा गरिरहेको एक जिल्ला नेताले बताए ।
सांसद खड्काको आरजु राणासँग निकट सम्बन्ध भएकै कारण ओझाले उनलाई खुशी बनाउन आईफोन किनिदिएको काँग्रेसका एक नेताले अनलाइन डबलीसँग बताए ।
