काठमाडौं । सर्वोच्च अदालतले नक्कली भुटानी शरणार्थी प्रकरणमा नेकपा एमाले नेता टोपबहादुर रायमाझीसहित ७ जनालाई थुनामै राख्न आदेश दिएको छ ।

नक्कली भुटानी शरणार्थी प्रकरणमा उनिहरु जिल्ला अदालत काठमाडौं र उच्च अदालत पाटनले पुर्पक्षका लागि थुनामा राख्न आदेशविरुद्ध सर्वोच्च अदालत गएका थिए ।

बिहीबार न्यायाधीश कुमार रेग्मी र टेकप्रसाद ढुंगानाको इजलासले उच्च अदालत पाटनकै आदेश सदर गरेसँगै धरौटीमा छुट्ने रायमाझीको सपना पूरा भएन ।

सर्वोच्चले रायमाझीसँगै तत्कालिन गृहसचिव टेकनारायण पाण्डे, तत्कालिन गृहमन्त्री रामबहादुर थापा बादलका सल्लाहकार इन्द्रजित राई, भुटानी शरणार्थी प्रकरणका मुख्य आरोपी केशव दुलाल, सानु भण्डारी, सागर राई र सन्देश शर्मा थुनामै रहने भएका छन् ।

सर्वोच्चले उक्त प्रकरणमा थुनामै रहेका पूर्वसांसद एवं कांग्रेस नेता आङटावा शेर्पालाई ३० लाख रुपैयाँ धरौटीमा छाड्न आदेश दिएको छ ।

यस्तै उच्चले थुनामा पठाएका गोबिन्दकुमार चौधरी १० लाख र तत्कालिन हज समितिका अध्यक्ष शमशेर मियालाई साधारण तारेखमा छाड्न सर्वोच्चले आदेश दिएको छ ।