Dabali News

उत्कृष्ट अग्रपंक्तिबीचको भिडन्तमा ‘गोलको उत्सव’ हुने

२६ असार

काठमाडौं । प्रतियोगिताको उत्कृष्ट अग्रपंक्ति भएका २ टोली बेल्जियम र फ्रान्स आज (मंगलबार) विश्वकपको पहिलो सेमिफाइनलमा आमने-सामने हुँदा ‘गोलको उत्सव’ हुने अनुमान गरिएको छ ।

दुवै टोलीमा युरोपका शीर्ष लिग खेल्ने उत्कृष्ट खेलाडीको बाहुल्य छ । फ्रान्सेली टोलीमा किलियन एमबाप्पे, एन्टोनी ग्रिजम्यान, पाउल पोग्बा र ओलिभर जिरौडको उपस्थिति छ भने बेल्जियम टोलीमा केभिन डी ब्रुयना, रोमेलु लुकाकु, इडेन हाजार्ड जस्ता उत्कृष्ट खेलाडीको उपस्थिति रहने छ ।

४ गोल गरेका लुकाकु जारी प्रतियोगिताको सर्वाधिक गोल गर्ने खेलाडी सूचीको दोस्रो स्थानमा छन् । त्यस्तै फ्रान्सका एमबाप्पेले ३ गोल गरिसकेका छन् । यी दुई टोली पछिल्लो १९८६ को विश्वकपमा भेटेका थिए । तेस्रो स्थानका लागि भएको खेलमा फ्रान्सले ४–२ ले बाजी मारेको थियो । त्यसपछि फ्रान्स र बेल्जियमबीच प्रमुख प्रतियोगितामा भेट नभए पनि आठ मैत्रीपूर्ण भिडन्त भइसकेका छन् । पछिल्लो पटक २०१५ मा भएको मैत्रीपूर्ण खेलमा बेल्जियम ४–३ ले विजयी भएको थियो ।

१९ वर्षे स्ट्राइकर किलियन एमबाप्पेको नेतृत्वमा रहेको अग्रपंक्ति र कम अनुभवी बेन्जामिन पाभर्ड र लुकास हर्नान्डेजको रक्षापंक्तिको जोडीले प्रतियोगिता अवधिभरै जुझारु प्रदर्शन गर्दै २००६ पछि पहिलो पटक अन्तिम ४ मा स्थान पक्का गरेको हो । ‘हामी कसैसँग डराउँदैनौं,’ पाभर्डले भने, ‘हामी प्रतियोगिताको पहिलो खेलबाटै उच्च मनोबलका साथ मैदानमा उत्रिरहेका छौं र हामीलाई हाम्रो क्षमता थाहा छ ।’

फ्रान्सलाई १९९८ को विश्वकप र २००० को युरोपियन च्याम्पियनसिपको उपाधि जिताउँदा टोलीका कप्तान रहेका डिडियर डेसच्याम्पले अहिले टोलीको प्रशिक्षण सम्हालिरहेका छन् । ‘डेसच्याम्पले हाम्रो मनोबल बढाएका छन्,’ उनले भने, ‘हामी उनको प्रशिक्षणमा जुनसुकै प्रतिद्वन्द्वीको सामना गर्न पनि तयार छौं ।’ डेसच्याम्पले पाभर्डलाई दायाँ र हर्नान्डेजलाई बायाँ भागमा खेलाउने जोखिमपूर्ण निर्णय लिए । पाभर्ड र हर्नान्डेजले एक आपसमा मात्र २० अन्तर्राष्ट्रिय खेल खेलेका छन् । तर उनीहरूले जारी प्रतियोगितामा उत्कृष्ट प्रदर्शन गरिरहेका छन् ।

यता २०१६ अगस्टमा बेल्जियम टोलीको प्रशिक्षण सम्हाल्दा रोबेर्टो मार्टिनेजले कुनै एक खेलाडीको प्रदर्शनमा भन्दा पनि टोलीको भावनाअनुसार खेल्ने रणनीति अपनाए । एभर्टनबाट बर्खास्तगीमा परेलगत्तै उनले बेल्जियम टोलीको प्रशिक्षण सम्हालेका थिए ।
घरेलु मैदानमा स्पेनसँगको २–० को हारसँगै उनको प्रशिक्षण यात्रा सुरु भएको थियो । तर त्यसपछि भने बेल्जियम २३ खेलमा अपराजित रहँदै आएको छ । यस क्रममा टोलीले ७८ गोल गरिसकेको छ ।

२३ खेलमध्ये एक खेल मात्र गोलरहित बराबरीमा टुंगिएको छ । फ्रान्सका पूर्वस्ट्राइकर थियरी हेनरीलाई सहायक प्रशिक्षकको जिम्मेवारी दिएको बेल्जियमले रूस विश्वकपका ५ खेलमा १४ गोल गरिसकेको छ । अन्तिम १६ मा जापानसँग २–० ले पछि परेको स्थितिमा मार्टिनेजले दुई विंगरको स्थानमा २ मिडफिल्डरलाई मैदान प्रवेश गराएका थिए । बेल्जियमले जापानको चुनौती अन्ततः ३–२ ले पन्छाएको थियो । मंगलबार हुने खेलमा फ्रान्सका गोलकिपर ह्युगो लोरिस र बेल्जियमका गोलकिपर थियाबाउट कोर्टियोस दुवै व्यस्त हुने अनुमान गरिएको छ । यद्यपि पछिल्लो समय केही गल्ती गरेको भन्दै लोरिसको भने आलोचना हुँदै आएको छ ।

अस्ट्रेलियाविरुद्धको पहिलो खेलमा लोरिसले लामो दूरीबाट आएको बलको दिशा सही अनुमान लगाउन चुकेपछि लोरिसको आलोचना भएको थियो । भाग्यवश उक्त बल क्रसबारमा लागेर फर्किएको थियो । तर त्यसपछिका खेलमा भने उनले आफ्नो प्रदर्शन सुधारेका छन् ।
त्यस्तै कोर्टियोसले ब्राजिलविरुद्धको खेलमा उल्लेख्य प्रदर्शन गर्दै टोलीलाई अन्तिम ४ मा प्रवेश गराएका थिए । यता रक्षक थोमस म्युनर दोस्रो पहेंलो कार्डका कारण फ्रान्सविरुद्धको खेलमा उपलब्ध नभए पनि रक्षक भिसेन्ट कोम्पनी र यान भेर्टोन्घन र मिडफिल्डर मारौने फेलानीको उपस्थिति बेल्जियम टोलीका लागि बलियो पक्ष बन्न सक्छ ।

म्युनरको अनुपस्थितिमा ३-५-२ को रणनीति अपनाउने गरिएको छ । फ्रान्सका स्ट्राइकर ओलिभर जिरौडले जारी प्रतियोगितामा कोर्टियोसभन्दा लोरिस अब्बल भएको बताए । ‘दुवै जना विश्वकै उत्कृष्ट गोलकिपर हुन्,’ जिरौडले भने, ‘ तर जारी प्रतियोगितामा भने लोसिर अब्बल छन् ।’

Ad
Ad
Ad

डबली मिडिया प्रा.लि.द्वारा सञ्चालित डिजिटल न्युज पोर्टल अनलाइन डबली डटकम निरन्तर चलिरहेको छ ।
हामीले खासगरी खोजमूलक समाचारलाई स्थान दिने गरेका छौं । सबैका सन्तुलित विचार हाम्रो अनलाइनको प्राथमिकतामा पर्छन् ।

डबली मिडिया प्रा.लि. द्वारा संचालित 

अनलाइन डबली डटकम को लागि

अध्यक्षः दिपेन्द्र रावल

सम्पादकः धनन्‍जय बुढा

संवाददाताः जगतबहादुर विष्ट

दर्ता नं. १५४/०७३-७४

Dabali Media Pvt. Ltd.
Anamnagar Kathmandu
Phone
01-4771244
Email
[email protected]
[email protected]