![](https://onlinedabali.com/wp-content/uploads/2022/06/pancha.jpg)
काठमाडौँ । अनेरास्ववियु (क्रान्तिकारी)ले ३ महिने अभियान संचालन गर्ने निर्णय गरेको छ । त्यसको लागि प्रदेश इन्चार्ज र प्रमुख समेत तोकेको छ । संगठनको तेस्रो केन्द्रीय समितिको पूर्ण बैठकले अभियानको लागि देशभरिका १९ वटा कमान्ड सञ्चालनका लागि इन्चार्ज उपाध्यक्ष रहने र अभियानको प्रमुखमा सचिव र आयोगका प्रमुख, उपप्रमुखबाट गर्ने निर्णय गरेको छ ।
अध्यक्ष पञ्चा सिंह र महासचिव दिपेश पुनले विज्ञप्ति जारी गरेर बैठकका निर्णय सार्वजनिक गरेका छन् । विज्ञप्तिमा हरेक प्रदेशका जिल्लालाई दुई क्लस्टरमा विभाजन गर्दै इन्चार्ज तोकिएको उल्लेख गरिएको छ ।
विज्ञप्तिमा बैठकमा संगठनका महासचिव कमरेड दिपेश पुनद्वारा विद्यार्थीसँग अखिल (क्रान्तिकारी) अभियानको ३ महिने कार्ययोजना र संगठन परिचालन कार्यविधि, कार्य सम्पदान मूल्यांकन कार्यविधि, अनुशासनसम्बन्धी आचारसंहिता प्रस्तुत गर्न काम भयो भने आवश्यक संशोधनसहितको कार्ययोजना बैठकले संशोधनसहित पारित गर्ने निर्णय गरेको बताइएको छ ।
त्यसैगरी बैठकले त्रिभुवन विश्वविद्यालयलगायत विभिन्न विश्वविद्यालयमा लामो समयदेखि सम्पन्न हुन नसकिरहेका स्वतन्त्र विद्यार्थी युनियनको निर्वाचनलाई संघीय र प्रादेशिक निर्वाचन अगावै सम्पन्न गर्ने माग पनि गरेको छ ।
केन्द्रीय समितिको पूर्णताका लागि केन्द्रीय सदस्य र २९९ को एकतिहाइ सचिवालय सदस्य मनोनयन गर्ने निर्णय पनि भएको छ। त्यसैगरी २७ वटा विभागले पनि पूर्णता पाएका छन् ।