काठमाडौं । एक जना महिला प्रहरीको ज्यान गएपछि मोरङको लेटाङमा विहानैबाट कर्फ्यु लगाइएको छ । मोरङका प्रमुख जिल्ला अधिकारी काशीराज दाहालका अनुसार अर्को आदेश नभएसम्म बिहान ७ बजेदेखि कर्फ्यु लगाइएको छ ।
दक्षिणमा लेटाङ नगरपालिका-३ र ४, लेटाङ-५ का सबै क्षेत्र, उत्तरमा लेटाङ-६ को वडा कार्यालय क्षेत्र, पूर्वमा मोरङेखोला क्षेत्र र पश्चिममा चिसाङ खोला क्षेत्र तोकेर क’र्फ्यु लगाइएको छ ।
होली खेल्ने क्रममा शिक्षकले छात्रालाई यौन दुर्व्यवहारको विषयलाई लिएर स्थानीय बासिन्दा र प्रहरीबीचको झडप भएको थियो । प्रहरीले शिक्षकलाई बचाउन खोजेको भन्दै स्थानीय र विद्यार्थी प्रहरीसँग आक्रोसित भएका थिए ।
शिक्षकले शुक्रबार गरेको दुर्व्यवहारबारे विद्यालयमा छलफल भइरहेको बेला तनाव उत्पन्न भएको थियो । झडपमा परी प्रहरी जवान उर्मिला श्रेष्ठको ज्यान गएको हो। घटनामा केही प्रहरी र स्थानीय बासिन्दा समेत घाइते भएका छन् ।
होली खेल्ने क्रममा घर पुगेका शिक्षकले १२ वर्षीया छात्रालाई दुर्व्यवहार गरेका थिए । छात्रालाई निरन्तर दुर्व्यवहार गर्ने शिक्षकलाई प्रहरीले बिना कारबाही बचाउन लागेको भन्दै शिक्षा विकास माविका विद्यार्थी र स्थानीय बासिन्दा आक्रोशित भएका थिए ।
आक्रोशित भिडलाई नियन्त्रणमा लिन प्रहरीले केही सेल अश्रु ग्यास र हवाई फायर गरेको थियो ।
