काठमाडौँ । केही दिनेयता भइरहेका बर्षा र हिमपात आजबाट रोकिने भएको छ । पश्चिमी न्यून चापीय प्रणालीका कारण देशभर मौसम बदली भएर बर्षा र हिमपात भएको थियो ।
पहाडी र हिमाली क्षेत्रको जनजीवन प्रभावित भएको छ । पहाडी क्षेत्रका राजमार्ग अवरुद्ध हुनुको साथै हवाई सेवा समेत प्रभावित भएको छ । मौसम पूर्वानुमान महाशाखाका अनुसार आजबाट पूर्ण सुधार भएर घाम लाग्ने छ ।
आजदेखि दुई–तीन दिन मौसम सुधार हुने र बुधबार बिहीबारदेखि फेरि अर्को मौसमी प्रणाली विकसित हुने सम्भावना देखिएको मौसमविदले बताएका छन् ।
मौसम पूर्वानुमान महाशाखाका अनुसार अर्को प्रणाली नआउँदासम्म बिहान केहीबेर हुस्सु कुहिरो लागे पनि दिउँसोे घाम लाग्नेछ । अब अर्को प्रणाली नआएसम्म पानी पर्ने सम्भावना नभएको महाशाखाले जनाएको छ ।
गएको बुधबार रातिदेखि नेपाल प्रवेश गरेको न्यूनचापीय प्रणालीको प्रभावका कारण देशका धेरै ठाउँमा वर्षा र हिमपात हुँदा चिसो बढेको छ ।
