काठमाडौं । राष्ट्रपति विद्यादेवी भण्डारीले बोलाएको सर्वदलीय बैठक नेकपा (एमाले)को माधव कुमार नेपाल समूहले बहिस्कार गरेको छ । राष्ट्रपति भण्डारीले आह्वान गरेको सर्वदलीय बैठक पूर्वप्रधानमन्त्री माधव कुमार र नेपालले बहिस्कार गरेका हुन् । यो समूहले प्रधानमन्त्री केपी शर्मा ओलीले बोलाएको चियापान कार्यक्रम पनि बहिस्कार गरिसकेका छन् ।
एमाले नेपाल समूहका नेता विष्णु रिजालका अनुसार नेपाल र खनाल बुधबार र बिहीबार हुन लागेको राष्ट्रिय कार्यकर्ता भेलाको तयारीमा जुटेकाले नभ्याएर नगएका हुन् । नेपाल र खनालसहितका नेताहरु राष्ट्रिय भेलामा पेश हुने अवधारणापत्र तयारीमा जुटेका छन् ।
राष्ट्रपति भण्डारीले बोलाएको बैठकमा सहभागिताको लागि नेताहरु शितल निवास पुगिसकेका छन् । अहिले चार बजेबाट सुरु हुने कार्यक्रममा सहभागी हुन केही नेताहरु जाँदैछन् । बैठकमा नेकपा एमाले, नेपाली कांग्रेस, माओवादी केन्द्र, जनता समाजवादी पार्टी, राष्ट्रिय प्रजातन्त्र पार्टी, राष्ट्रिय जनमोर्चा र नेपाल मजदुर किसान पार्टीका नेताहरुलाई भण्डारीले बोलाएकी छन् ।
प्रधानमन्त्री ओली सत्तासमिकरणमा संकट परेको बेला भण्डारीले सर्वदलीय बैठक बोलाएको बताइएको छ । नेपाल समूहले भने नजाने निर्णय गरिसकेको छ । राजनीति संकट, ओली सरकार संकटमा परेको बेला त्यसलाई सहयोग पुग्ने गरी सर्वदलीय बैठक बोलाइएको भन्दै नेपाल समूहले भने विरोध जनाइएको छ ।
