काठमाडौं । आज पुनः मेलम्ची खानेपानी आयोजनाको सुरुङको परीक्षण आज गरिँदै छ । यसअघि परीक्षण गर्दा गेट फुटेर मानवीय क्षति हुन पुगेको थियो । साढे २६ किलोमिटर लामो सुरुङमा आजदेखि फेरि पानी भरेर परीक्षण गर्न लागिएको आयोजनाले जनाएको छ ।
खानेपानी मन्त्री मणी थापाले आयोजनास्थल मेलम्चीमै औपचारिक कार्यक्रमबीच सुरुङमा पानी भर्ने कार्यको उद्घाटन गरेका हुन् । सिन्धुपाल्चोकको मेलम्ची खोलादेखि काठमाडौंको सुन्दरीजलसम्मको साढे २६ किलोमिटर सुरुङ भर्न १५ देखि २० दिन लाग्ने आयोजनाले बताएको छ ।
यसअघि असार २९ गते गरिएको परीक्षणको क्रममा हेलम्बु गाउँपालिका-१ स्थित अम्बाथानको अडिटको मुख्य गेट (नं १७) फुटेर निस्केको पानीले आयोजनाका एक इन्जिनीयर र चालकलाई बगाएको थियो । परीक्षण असफल भएपछि आयोजनाको मुख्य दातृ निकाय एशियाली विकास बैंक (एडीबी) को अनुदान सहयोगअन्तर्गत चारजना विशेषज्ञको टोलीले सुरुङ, मुहानस्थल, गेटलगायतका संरचनाको पुनः जाँच गरी मर्मत गरिएको थियो ।
आजबाट गरिने परीक्षणमा कुनै घटना हुन सक्ने भएकोले हेलिकोप्टर तयारी अवस्थामा राखिएको छ । घटना भएमा घाइतेहरुको तत्काल उपचारको व्यवस्था समेत गरिएको छ ।
आयोजनाका अनुसार परीक्षणका लागि प्राविधिक मापदण्डअनुसार प्रतिसेकेन्ड २६० लिटर पानीका दरले सुरुङमा पानी प्रवाह गरिनेछ । सुरुङमा पानी भरिएपछि करिब १० दिन यतिकै राखिनेछ । त्यसपछि प्रतिसेकेन्ड २६० लिटरकै दरमा १५ देखि २० दिन लगाएर बाहिर पानी फालेर सुरुङ खाली गरिनेछ । पानी सबै फालिसकेपछि करिव ७ दिन लगाएर सुरुङको गुणस्तर पुनः परीक्षण गरिनेछ ।
केही समस्या देखिए त्यसलाई समाधान गरिने छ । यो सबै काम सकिएपछि फेरि पुरानै प्रक्रियाबाट नियमित रुपमा सुरुङमा पानी भर्न थालिने छ ।
