काठमाडौं । नेपाल कम्युनिस्ट पार्टी (नेकपा) प्रचण्ड–माधव समूहले प्रधानमन्त्री केपी शर्मा ओलीमाथि कारवाही गरेको छ । सो समूहको आइतबार बसेको स्थायी कमिटी बैठकले ओलीलाई साधारण सदस्यबाटै निष्काशन गरेको छ ।
सो समूहले किन थप कारवाही नगर्ने भन्दै ओलीसँग स्पष्टिकरण मागेको थियो । (नेकपा)का अध्यक्ष समेत रहेका प्रधानन्त्री ओलीले संसद् विघटन गर्ने निर्णय गरेसँगै (नेकपा) दुई समूहमा विभाजन भएको छ । निर्वाचन आयोगले निर्णय नगरेकोले आधिकारिकताको लडाइँ जारी छ ।
यसअघि प्रचण्ड-नेपाल समूहले बहुमतको निर्णय भन्दै अध्यक्षबाट ओलीलाई हटाएर माधव कुमार नेपाललाई चयन गरेको थियो । अध्यक्षबाट हटाएपछि माघ ३ गते बसेको सो समूहको स्थायी कमिटी बैठकले संविधान, लोकतन्त्र, जनता र पार्टीविरुद्ध गतिविधि गरेकाले साधारण सदस्यबाट किन नहटाउने भनेर ओलीलाई स्पष्टीकरण सोध्ने निर्णय गरेको थियो ।
उक्न निर्णय प्रचण्ड-नेपाल समूहका नेताहरु बालुवाटारमा पुगेर पत्र बुझाएका थिए । प्रवक्ता नारायण काजी श्रेष्ठका अनुसार ओलीले जवाफ नदिएकाले केन्द्रीय कमिटीले दिएको अधिकार प्रयोग गरेर निस्काशन गर्ने निर्णय सो समूहले गरेको छ ।
त्यसैगरी प्रचण्ड -नेपाल समूहले पार्टी कार्यालय सचिवमा गंगालाल तुलाधरलाई थपेको छ भने उपसचिवमा मोहन गौतमलाई मनेनित समेत गरेको छ भने अर्का उपसचिव छिट्टै थपिने बताइएाको छ ।
त्यसैगरी संसद् विघटन गर्ने प्रधानमन्त्री ओलीको कदमलाई असंवैधानिक भन्दै सिंगो देश एक ढिक्का भएको र पार्टीले थालेको संघर्षप्रति कार्यकर्ता उत्साहित रहेको निष्कर्ष प्रचण्ड–नेपाल समूहको रहेको छ । बैठकले संयुक्त संघर्षका लागि पहल जारी राख्ने र एक अर्काले चलाएको आन्दोलनलाई पूरकका रुपमा अगाडि बढाउने निर्णय गरेको प्रवक्ता श्रेष्ठले जानकारी दिए ।
प्रवक्ता श्रेष्ठका अनुसार भोलि नै संघर्ष समितिले आन्दोलनका थप कार्यक्रम सार्वजनिक गर्ने तयारी गरेको छ ।
- फाइल फोटो
