अनलाइन डबली
कालीकोट । जिल्लाको रास्कोट नगरपालिकाले एमबीबीएस अध्ययनरत विद्यार्थी जनकराज बराललाई पाँच लाख रुपैयाँ आर्थिक सहयोग गरेको छ ।
बराल रास्कोट नगरपालिका वडा नं. ८ का स्थायी बासिन्दा हुन् । हाल उनी भैरहवामा रहेको युनिभर्सल कलेज अफ मेडिकल साइन्समा एमबीबीएस दोस्रो बर्षमा अध्ययनरत छन् । रास्कोट नगरपालिकाले नगर सभाको १६ औं अधिवेशनमा बराललाई चेक हस्तान्तरण गरेको हो ।
नगरपालिकाले जेहेन्दार, गरिब, सहिद परिवारका विद्यार्थीलाई उच्च शिक्षा अध्ययनका लागि आर्थिक सहयोग गर्ने उद्देश्यले मेयर छात्रवृत्ति कोष स्थापना गरी सञ्चालनमा ल्याएको छ । छात्रवृत्ति प्राप्त गरेका बरालले नगरपालिकाले छात्रवृत्ति वापत आफुलाई आर्थिक सहयोग गरेकोमा खुशी व्यक्त गरेका छन् ।
उनले भने, “नगरपालिकाले आर्थिक सहयोग गरेकोमा मलाई अत्यन्तै खुसी लागेको छ । यो रकमले अध्ययनमा मलाई थप उर्जा मिलेको छ ।” उनका बुवा हरिचन्द बरालले नगरपालिका र नगर प्रमुखलाई धन्यवाद दिदै आफ्नो छोरा डाक्टर बनेपछि रास्कोट नगरपालिकाले लगाएको गुन तिर्ने बताए । नगरपालिकाको सहयोगले आफ्नो छोरा डाक्टर बन्ने कुराको थप सुनिश्चितता भएको उनको विश्वास छ ।
