काठमाडौं । नेपाल कम्युनिष्ट पार्टी (नेकपा)ले प्रदेश ३ को नाम र राजधानी टुगो लगाएको छ ।
प्रधानमन्त्री निवास बालुवाटारमा आज बसेको सचिवालय बैठकले प्रदेशको नाम वाग्मती र राजधानी हेटौंडा कायम गर्ने गरी प्रदेश कमिटी तथा प्रदेशसभा दललाई निर्देशन दिने निर्णय गरेको हो ।
अब ३ नं. प्रदेशले एक साताभित्र स्थायी नाम र राजधानी पाउने छ । यसअघि नेकपाकै सांसदहरूबीच कुरा नमिल्दा प्रदेशको नाम र राजधानीमा २ वर्षदेखि निर्णय हुन सकेको थिएन ।
मुख्यमन्त्री डोरमणि पौडेलले पनि पुस २० गतेसम्म नाम र राजधानी टुंगो लाग्ने जानकारी दिएका छन् । तर उनले नेकपाले मात्रै निर्णय गरेर नपुग्ने भन्दै प्रदेश संसद बैठक बसेर यसलाई वैधानिकता दिनुपर्ने बताएका छन् । नेकपाको निर्णयलाई सार्वजनिक भने गरिएको छैन ।
प्रदेश ३ को प्रदेशसभामा नेकपाको २ तिहाइ बहुमत छ । २०७४ मा शेरबहादुर देउवा नेतृत्वको सरकारले निर्वाचन अघि प्रदेशको अस्थायी राजधानी हेटौंडा तोकेको थियो । प्रदेश राजधानी एकछेउमा भएको र अरू जिल्लालाई पायक पर्ने ठाउँमा नभएको भन्दै सार्ने चर्चा चले पनि नेकपाले हेटौंडा नै उपयुक्त हुने निष्कर्ष निकालेको छ ।
बैठकले सभामुखको उम्मेदवारको विषयमा भने निर्णय गर्न सकेन ।
