काठमाडौं । बागमती प्रदेशका स्वास्थ्य मन्त्रालयका सचिव बद्री खड्का पुनः बहाली भएका छन् । स्वास्थ्य मन्त्री उत्तम जोशीको स्वार्थमा काम गर्न तयार नभएपछि खड्कालाई सरुवा गरिएको थियो ।
प्रदेश सरकारले कानून विपरित सरुवा गरेको भन्दै खड्का अदालत पुगेका थिए । सर्वोच्च अदालतले विहीबार बद्री खड्कालाई पुनः सचिव पदमा काम गर्न अन्तरिम आदेश दिएको छ ।
सर्वोच्चका न्यायधीश हरिप्रसाद फुयाँलको एकल इजलासले खड्कालाई पुनः बहाली गर्न अन्तरिम आदेश दिएको हो ।
मन्त्रीको स्वार्थअनुसार काम नगरेपछि मंसिर १२ गते बसेको प्रदेश मन्त्रिपरिषद्को बैठकले खड्कालाई सचिवको जिम्मेवारीबाट हटाएको थियो । सोही बैठकले १० औँ तहका दीपक तिवारीलाई निमित्त सचिवको जिम्मेवारी दिएको थियो ।
खड्काको पुनः बहालीसँगै स्वास्थ्यमन्त्री जोशीमाथि नैतिक प्रश्न उठेको छ ।