काठमाडौं । हरेक शनिबार बिहान २ घण्टा चल्ने बगमती सरसफाई अभियानले अहिले झण्डै १० बर्ष पछि आहा कति सफा भन्न लायक बन्दै गएको छ । २०७० साल जेठ ५ गतेबाट सुरु भएको यो अभियान आज २०७९ पुस २३ गते शनिबार गैरिघाटमा ५०४ औं हप्ता सम्पन्न भएको छ ।
अधिकार सम्पन्न बागमती सभ्यता एकीकृत विकास समितिले निरन्तर चलाईरहेको यो नदी सफाई अभियानले देशब्यापी रुप लिन थालेको पनि देखिन्छ । राजधानीका अन्य नदीहरु विष्णुमति, धोविखोला, मनोहरा, टुकुचाहरुमा मात्रै सिमित नभएर देशका विभिन्न सहरहरुमा पनि सफाईको कार्य सुरु भएको बगमती सफाई अभियान्ताहरु बताउँछन् ।
शनिबार गौरीघाट गुहेश्वरीमा ५ सय ४ औं हप्ता सफाई अभियानमा सहभागी तथा यसका सुरुवातकर्ता नेपाल सरकारका पूर्व मुख्य सचिव लिलामणि पौडेलले १० वर्ष अघिको बागमतीको अवस्था र अहिलेकोमा निकै फरक भइसकेको बताए । अधिकार सम्पन्न बागमती सभ्यता एकीकृत विकास समितिका अध्यक्ष उद्दब प्रसाद तिमल्सिना हरेक हप्ता झैं आज पनि बगमती सफाईमा जुट्दै भन्दै थिए आहा कति सफा ! अब केहि समय पछि पौडि खेल्न र नुहाउन लायक बनाउँछौं ।
सुरुवाती समयदेखि निरन्तर खटिंदै आएका नेपाल सरकार सेवानिवृत्त गोविन्द काफ्लेले आफूहरुको मेहनत र श्रमदानले राम्रो परिणाम निकालेकोमा हर्षित हुँदै भन्दै थिए,“यो अभियानको सिको देशैभर हुँदै छ ।” रेडियो नेपालका प्रमुखबाट सेवा निवृत्त अर्का अभियान्ता रामशरण कार्कीले बागमती अभियानलाई नमुना अभियान बनाउँने चाहनाले सफलता लिँदै गएको बताए । त्यसैगरी बागमती फोहोर उन्मुलन नमुना उपभोक्ता समाजका उपभोक्ता, अर्की अभियान्ता चम्पा कार्की, लगायतका सयौं अभियान्ताले बागमती सफा पारेरै छाड्ने बताए ।
