अनलाइन डबली
काठमाडौँ । रुसले युक्रेनमाथि सैन्य कारवाही थालेको आज ५३ दिन भएको छ । रुसले मारियोपोलसहित अधिकांश क्षेत्रमाथि नियन्त्रण कायम गरेको छ । भने केही क्षेत्रमा फाटफुट लडाइँ भइरहेको छ ।
अमेरिकासहित नेटो देशहरुले दिएको सैन्य सहयोगको भरमा लडिरहेको युक्रेनमाथि रुसले थप दवाव सिर्जना गरेको छ । हिजोमात्रै युक्रेनलाई सहयोग नगर्न चेतावनी दिँदै सहयोग गरे अकल्पनीय अवस्था सिर्जना हुने भनेको थियो । अमेरिकाले पछिल्लो पटक सैन्य सहयोग पठाउन सुरु गर्नुअघि रुसले सो चेतावनी दिएको हो । यसले रुसले कतिखेर कसमाथि प्रहार गर्ने हो भन्ने एउटा डर पैदा भएको छ ।
यसैबीच बेलायतका प्रधानमन्त्री बोरिस जोनसनसहित उच्च अधिकारीमाथि रुसले प्रतिबन्ध लगाएको छ । रुसले बेलायतका प्रधानमन्त्री, विदेशमन्त्री, रक्षामन्त्रीसहित १३ जना उच्च अधिकारीमाथि प्रतिबन्ध लगाएको हो । अब उनीहरुले रुस प्रवेश गर्न नपाउने भएका छन् । उनीहरुको रुससँग सम्बन्ध भएका सबै गतिविधिमाथि प्रतिबन्ध लगाएको छ । प्रतिबन्ध लागेका अधिकारीहरुले रुसी बैंक वा कम्पनीसँग भएको कारोबार रोक्का हुने बताइएको छ ।
बेलायतले रुसी अधिकारीलाई देश निकाला गरेको थियो । त्यसको जवाफ रुसले दिएको बताइएको छ । रुसले थप अधिकारीमाथि पनि प्रतिबन्धको तयारी गरेको अन्तर्राष्ट्रिय संचारमाध्यमहरुले जनाएका छन् ।
रुसले अमेरिकाका उच्च अधिकारीमाथि पनि प्रतिबन्धको तयारी गरेको छ । यसअघि रुसले औपचारिक रूपमा संयुक्त राज्य अमेरिका र अरू साझेदार देशहरूलाई युक्रेनलाई हतियार उपलब्ध नगराउन चेतावनी दिएको थियो । युक्रेन विवादपछि पहिलो पटक औपचारिक रुपमा रुसले अमेरिकालाई चेतावनी दिएको हो ।
रुसको एउटा कूटनीतिक नोटको माध्यमबाट दिएको सो चेतावनी दिएको अमेरिकी सञ्चारमाध्यमहरूले बताएका छन् । दुई पृष्ठको कूटनीतिक नोट अमेरिकी विदेश मन्त्रालयलाई रुसको वासिङ्टन डिसीस्थित दूतावासले उपलब्ध गराएको थियो ।
त्यसमा अमेरिका र नेटोलाई हतियार सहयोगले युक्रेनको द्वन्द्व थप चर्काइरहेको र त्यसले “भविष्यवाणी गर्न नसकिने परिणाम“ निम्त्याउन सक्ने बताइएको छ ।
अमेरिकी राष्ट्रपति बाइडनले आठ करोड अमेरिकी डलर बराबरको सैन्य सहयोगलाई अनुमोदन गरेका छन् । जसमा पहिलो पटक लामो दूरीमा पनि निशाना लगाउनसक्ने होविटजर्सजस्ता हतियार पनि छन् । प्याकेजमा हतियारहरू, ड्रोन, बख्तरबन्द गाडीहरू र हेलिकोप्टरहरू पनि छन् ।
रुसको चेतावनीपछि अब अमेरिकाले घोषणा गरेको सहयोग पठाउछ वा पठाउँदैन भन्ने केही विवरण सार्वजनिक भएका छैनन् । अमेरिकाले औपचारिक रुपमा चेतावनीबारे केही नबताएपनि अमेरिकाले उपलब्ध गराउने भनेको सैन्य सहयोगको पहिलो किस्ता केही दिनपछि युक्रेन पुग्ने बताइएको छ ।
