काठमाडौं । १३ औं दक्षिण एसियाली खेलकुद प्रतियोगिता (साग) अन्तर्गत पुरुष भलिबलको स्वर्णपदक भारतले जितेको छ ।
त्रिपुरेश्वरस्थित राष्ट्रिय खेलकुद परिषदको कभर्डहलमा मंगलबार भएको फाइनल खेलमा पाकिस्तानलाई ३-१ ले हराउँदै भारतले स्वर्ण जितेको हो ।
पहिलो सेट पाकिस्तानले २५-२० अंकले जितेको थियो । त्यसपछि भारतले लगातार ३ सेट जित्यो । भारतले दोस्रो सेट २५-१५, तेस्रो सेट २५-१७ तथा चौथो सेट २९-२७ अंकले जितेको हो ।
अहिले त्रिपुरेश्वरस्थित राष्ट्रिय खेलकुद परिषदको कभर्डहलमा महिला भलिबलतर्फ स्वर्णपदकका लागि नेपाल र भारतबीच खेल भइरहेको छ ।
