काठमाडौं । अख्तियार दुरुपयोग अनुसन्धान आयोगले नायब सुब्बालाई घुस रकमसहित पक्राउ गरेको छ ।
जग्गा दाखिल खारेज दर्ता पुर्जी उपलब्ध गराइ दिएवापत सेवाग्राहीसँग १५ हजार घुस रकम माग गरिरहेको अवस्थामा जिल्ला अदालत पश्चिम रुकुमको मुसिकोटमा कार्यरत नायब सुब्बा रमेशकुमार खड्कालाई पक्राउ गरेको हो ।
जग्गा दाखिल खारेज दर्ता पुर्जी उपलब्ध गराउनु पर्नेमा नगराई पटक पटक मोलमोलाई गरी ६० हजार घुस रकम माग्ने गरेको र अन्तिम समयमा १५ हजार घुस नदिइकन कागज पत्र नदिने भन्ने सूचना सेवाग्राहीले दिएको आधारमा आयोगको टोलीले उनलाई पक्राउ गरेको हो ।
अख्तियार दुरुपयोग अनुसन्धान आयोगको कार्यालय सुर्खेतबाट खटिएको टोलीले उनलाई रुकुम पश्चिम मुसिकोट नगरपालिका १ खलंगा स्थित राप्ती होटल एण्ड लज अगाडिबाट शुक्रबार नियन्त्रणमा लिएर अनुसन्धान अघि बढाएको छ ।
