अनलाइन डबली
काठमाडौं । नेपाली काँग्रेसका नेता डा. शेखर कोइरालाले आफ्नो पक्षका नेताहरुलाई सरकारबाट हट्न निर्देशन दिएका छन् ।
चीनमा रहेका कोइरालाले सरकारबाट आफ्नो पक्षका मन्त्रीलाई राजिनामा दिन निर्देशन दिएका हुन् । यो निर्देशनसँगै कृषि तथा पशुपन्छी विकास मन्त्री रामनाथ अधिकारीले मन्त्री पदबाट राजीनामा दिने घोषणा गरेका छन् ।
मंगलबार विहान एक सन्देश सार्वजनिक गर्दै पदीय जिम्मेवारीमा टाँसिइरहन अपराधबोध भएकोले देश र जनतासमक्ष नैतिक रूपमा क्षमायाचना गर्दै, सरकारको अलोकतान्त्रिक कदमप्रति आपत्ति जनाउँदै देश र जनतासमक्ष मन्त्री पदबाट राजीनामा पेश गरेको जनाएका छन् ।
यसैगरी स्वास्थ्य तथा जनसंख्यामन्त्री प्रदिप पौडेलले पनि राजिनामा दिने तयारी गरेको स्रोतले बतायो ।
यसैबीच काँग्रेस महामन्त्री गगन थापाले आफू रातभर निदाउन नसकेको बताउँदै सरकारबाट पार्टीलाई फिर्ता बोलाउन निर्णय गराउन लाग्ने सार्वजनिक रुपमा बताएका छन् ।
योसँगै ओली सरकार संकटमा परेको छ । नेता कोइराला पक्षका मन्त्रीले राजिनामा दिएपछि ओलीलाई पनि नैतिक संकट पर्ने देखिन्छ । हिजो बसेका पदाधिकारी बैठकमा अधिकांश नेताहरुले सरकारबाट फिर्ता हुनेपर्ने माग राखेका थिए ।
