अनलाइन डबली
काठमाडौँ । भिजिट भिसाको नाममा नेपालमा मानव तस्करी हुने गरेको एकपछि अर्को तथ्य खुल्दै आइरहेका छन् ।
प्रधानमन्त्री केपी शर्मा ओलीको स्पेन भ्रमणमा सहभागीहरु नै नफर्किएकाे चर्चा सेलाउन नपाउँदै नेपाल स्काउटमा पनि भिजिट भिसामा ‘मानव तस्करी’ हुने गरेको तथ्य फेला परेको छ ।
प्रधानमन्त्री संरक्षक हुने नेपाल स्काउटबाट ‘ज्याम्बोरी’ को नाममा विभिन्न देशमा हुने कार्यक्रममा सहभागी हुन भिजिट भिसामा जाने र उतै लुक्दै आएको तथ्य फेला परेको हो ।
‘ज्याम्बोरी’ स्काउटको अन्तर्राष्ट्रियस्तरको कार्यक्रम हो । यो प्रत्येक तीन बर्षमा विभिन्न देशहरुले आयोजना गर्छन् । नेपालबाट अहिलेसम्म कतिवटा ज्याम्बाेरीमा सहभागिता भयाे ? कतिजना सहभागी र कतिजना उतै बसे भन्नेबारे नेपाल स्काउटले सूचना दिन नचाहेपनि विभिन्न समयमा ज्याम्बोरीमा सहभागी हुन भनेर भिजिट भिसामा जानेहरु नफर्किने भेटिएकाे हाे ।
यसमा पनि ठुलो सेटिङ हुने गरेको स्काउट अभियान्ताहरु आरोप छ । स्रोतका अनुसार सन् २०२२ जुलाई २२ देखि ३१ सम्म डेनमार्कमा ‘डेनमार्क ज्याम्बोरी २०२२’ सम्पन्न भयो । त्यस्तै, २०२३ अगष्ट १ देखि १२ सम्म कोरियाको २५ औं ज्याम्बोरी सम्पन्न भएको थियो ।
स्रोतका अनुसार यी दुईवटा ज्याम्बोरीमा एकैपटक धेरै संख्यामा स्काउट सदस्यहरु उतै लुकेका छन् । उनिहरुले स्काउटका उच्च तहमा सेटिङ गरेर उतै लुक्ने वातावरण मिलाएको र त्यसबापत लाखौं रकम खर्च समेत गरेको स्रोतको दाबी छ ।
ज्याम्बोरीमा सहभागि हुन भिजिट भिसामा गएर लुकेकामध्ये केहीले बीचमा नेपाल आएर परिवारसहित उतै फर्किएका छन् ।
नेपाल स्काउटका प्रमुख आयुक्त देवराज घिमिरेले ज्याम्बोरीमा जाने तर केही नफर्किएको स्वीकार गर्दै त्यतिबेला आफू समितिमा नभएको समेत बताए । उनले उक्त कार्य संस्थामा प्रतिस्ठासँग जोडिने भन्दै त्यससँग सम्बन्धीत कागजपत्र उपलब्ध गराउने समेत बताए । उतै लुकेका व्यक्तिहरुलाई फिर्ता ल्याउनेबारे के भइरहेको छ भन्नेबारे आफूले जानकारी गराउने बताएका छन् ।
त्यसैगरी हामीले स्काउटका निर्देशक रामप्रसाद भट्टराईसँग नेपालबाट ज्याम्बोरीमा गएकाहरु नफर्किएको बिषयमा प्रश्न गरेका थियौं तर उनले जवाफ दिन चाहेनन् ।
नेपालमा नेपाल स्काउटको वि.सं. २००९ सालमा भएको थियो । बालबालिका तथा युवा वर्गलाई कर्तव्य परायण, अनुशासित, स्वावलम्बी, सच्चरित्रवान तथा सुयोग्य नागरिक बनाउने, प्राकृति प्रकोप तथा दुर्घटना, समुदाय सेवलगायतका जनहित सम्बन्धी काम गर्ने उद्देश्य राखेर नेपाल स्काउटको स्थापना गरिएको थियो ।
पवित्र उद्देश्य राखेर स्थापना गरिएको संस्था मानव बेचबिखन जस्तो गम्भीर अपराध हुनु दुःखद् भएको स्काउट अभियान्ताहरु बताउँछन् ।
नेपाल स्काउटको संरक्षक प्रधानमन्त्री रहेन व्यवस्था गरिएको छ । त्यस्तै सम्पर्क मन्त्रालय युवा तथा खेलकुदमन्त्री प्रमुख स्काउट हुन्छन् । प्रधानमन्त्री नै संरक्षक रहेको संस्थामा मानव बेचबिखन हुँदा समेत सम्बन्धीत निकायले के हेरेर बसेका छन् भन्ने प्रश्न अभियान्ताले उठाएका छन् ।
याे पनि पढ्नुहाेस्
