काठमाडौं । आगामी चैत २८ गतेदेखि काठमाडौंमा चार लाख राशीको पोस्टबहादुर बोगटी कप स्मृति कप राष्ट्रिय पुरुष भलिबल प्रतियोगिता हुने भएको छ ।
पोस्टबहादुर बोगटी स्मृति प्रतिष्ठानको आयोजनामा चैत २८ गतेदेखि सुरु हुने प्रतियोगिता वैशाख २ गतेसम्म सञ्चालन हुने छ । प्रतियोगिताको उद्घाटन चैत २८ गते दिउँसो २ बजे दशरथ रङ्गशालाको कभर्ड हलमा प्रधानमन्त्री पुष्पकमल दाहाल ‘प्रचण्डले गर्ने कार्यक्रम तय गरिएको आयोजकले जनाएको छ ।
प्रतिष्ठानले आज पत्रकार सम्मेलन गरी प्रतियोगिताबारे जानकारी गराएको हो । प्रतियोगिताको प्रथम पुरस्कार राशि चार लाख रहेको छ । त्यस्तै द्वितीय हुनेले दुई लाख, तृतीय हुनेले एक लाख र सान्त्वना हुनेले ५० हजार रुपैयाँ पुरस्कार पाउने छन् । त्यस्तै विधागत तर्फ छ विधामा दस/दस हजार र उत्कृष्ट खेलाडीलाई १५ हजार पुरस्कार रहेको बोगटी स्मृति प्रतिष्ठानका महासचिव निर्मल आचार्यले जानकारी दिनुभयो ।
प्रतियोगितामा नेपाली सेना, सशस्त्र प्रहरी, नेपाल प्रहरी तथा गण्डकी, लुम्बिनी र सुदूरपश्चिम प्रदेशको सहभागिता रहनेछ ।
राष्ट्रिय खेलकुद परिषद्को आर्थिक सहयोग र नेपाल भलिबल संघको प्राविधिक सहयोगमा प्रतियोगिता सञ्चालन हुनेछ । भलिबलतर्फ पहिलो शृंखलामै उल्लेख्य राशीको पुरस्कार राखेकोमा धन्यवाद दिँदै नेपाल भलिबल संघका अध्यक्ष जितेन्द्रबहादुर चन्दले प्रतियोगिताले निरन्तरता पाउनुपर्ने पनि बताउनुभयो । उहाँले प्रतियोगिता लिक कम नक आउट प्रणालीबाट सञ्चालन गरिने जानकारी दिनुभयो ।
पोस्टबहादुर बोगटी स्मृति प्रतिष्ठानका कार्यवाहक अध्यक्ष श्रीकृष्ण अधिकारीले सादगी नेता बोगटीलाई नयाँ पुस्तामाझ चिनाउन खेल आयोजना गरिएको बताउनुभयो । प्रतिष्ठानका अध्यक्ष अधिकारीको अध्यक्षतामा भएको कार्यक्रम सञ्चालन कोषाध्यक्ष रुद्रप्रसाद ढुङ्गेलले गर्नुभएको थियो ।
