अनलाइन डबली
काठमाडौँ । त्रिभुवन अन्तर्राष्ट्रिय विमानस्थलबाट ४८० किलो सुन बरामद गरी राजस्व असुल गरिएको छ । यो एकै मितिमा नभएर गएको ७ महिनामा उक्त सुन बरामद गरेको विमानस्थल भन्सार कार्यालयले जनाएको छ ।
भन्सार कार्यालयका अनुसार विदेशबाट फर्किनेहरुले विभिन्न गरगहनाका नाममा सुनलाई सामान्य तोडमोड गरेर ल्याएको अवस्थामा सो परिमाणको सुन बरामद गरी राजस्व असुलपछि सम्बन्धित व्यक्तिलाई प्रदान गरिएको छ ।
विदेशबाट फर्किने यात्रुले आफ्नो साथमा अधिकतम १०० ग्रामसम्म काँचो सुन भन्सार तिरेर ल्याउन सक्छन् भने २५० ग्रामसम्म सुनको गरगहना ल्याउन पाइने व्यवस्था छ ।
भन्सार कार्यालयका प्रमुख प्रशासक महेश भट्टराईका अनुसार सात महिनामा ३ अर्ब ८० करोड रुपैयाँको सुन बरामद गरिएको हो । जसबाट ४५ करोड ५८ लाख रुपैयाा राजश्व संकलन भएको भट्टराईले जनाएका छन् ।
राजस्वको दायरमा आएसँगै सो परिमाणको सुन औपचारिक रुपमा किनबेच गर्न सकिने र अनौपचारिक अर्थतन्त्रमा निरुत्साहित पुग्ने भन्सार कार्यालयले जनाएको छ ।
