अनलाइन डबली
काठमाडौँ । भारतीय प्रधानमन्त्री नरेनद्र मोदीले कसैको दवावमा आएर युक्रेन विवादमा नफस्ने बताएका छन् । उनले आफ्नो देश रुसविरुद्ध लगाइएको प्रतिबन्धका पक्षमा नरहेको समेत बताए ।
भारतीय संचारमाध्यमहरुका अनुसार जी सेभनको शिखर सम्मेलनमा जर्मनी पुगेका मोदीलाई रुसविरुद्ध लगाइएको प्रतिबन्धको समर्थनमा उभिन आग्रह गरिएको थियो । अमेरिकी राष्ट्रपतिसहित अन्य नेताहरुले युक्रेन मामलामा तटस्थ नबस्ने र रुसी तेल आयत बन्द गर्न समेत मोदीलाई आग्रह गरेका थिए ।
जवाफमा मोदीले युक्रेन घटनामा कसैको दवावमा आफ्नो धारणा नबलिने बताउँदै तेल आयात जारी राख्ने बताए । पश्चिमा देशहरुले भारतलाई पनि रुसविरुद्ध उभ्याउने प्रयास गरेका थिए । तर, मोदीले विभिन्न चरणमा भएका छलफलमा पनि आफ्नो नीतिमा परिवर्तन नहुने बताएको भारतीय संचारमाध्यमहरुले बताएका छन् ।
भारत जी सेभनको सदस्य नभएपनि आमन्त्रित गरिएको थियो । आमन्त्रितको हैसियतमा मोदी जर्मनी पुगेका थिए । उनले रुससँग आफ्नो देशका पुरानो सम्बन्धलाई तोड्न नसकिने बताएको भारतीय संचारमाध्यमहरुले बताएका छन् ।
शिखर सम्मेलनमा अमेरिकाको प्रस्तावमा युक्रेनलाई थप घातक हतियार दिने र रुसमाथि थप कडा प्रतिबन्ध लगाउनेमा सात देशहरुबीच पनि मत बाँझिएको बताइएको छ । भारतलगायत आमन्त्रित नेताहरुले पनि रुसविरुद्धको अमेरिकी प्रस्ताव अस्वीकार गरेका छन् ।
उता रुसले जी सेभनको शिखर सम्मेलनकै पूर्वसन्ध्यामा रुसले युक्रेनमा हमला तेज बनाएको छ । उसले नयाँ संस्करणका अस्त्र समेत प्रयोग गरेको छ । रुसले आफ्नो मिसन पूरा नगरी युक्रेनबाट पछि नहट्ने स्पष्ट सन्देश दिन हमला तेज बनाएको बताइएको छ ।
केही दिन पहिले मात्रै रुसी राष्ट्रपति भ्लादिमिर पुटिनले पश्चिमा देशहरुले आफ्नै नागरिकविरुद्ध गइरहेको बताएका थिए । उनले प्रतिबन्धले आफ्नो देशभन्दा पश्चिमा नागरिकलाई असर पर्ने बताए ।
त्यस्तै, संसदको रक्षा समितिका सदस्य तथा पूर्व जनरलले पश्चिमा देशहरुलाई अन्धकार, भोकमरीले छटपटिने बताएका थिए । उनले पश्चिमा देशहरु अझ अघि बढे आफ्नो क्षेत्रमा रडार सिस्टम लगाउने र पूर्वी यूरोपमा विजुली र अन्न सप्लाई रोक्ने चेतावनी समेत दिए । उनले
लिथुनियालाई बेलायतले प्रतिबन्ध लगाउन उक्साएको भन्दै तेस्रो विश्वयुद्ध भए आफ्नो देशले पहिलो हमला लण्डनमा गर्ने समेत चेतावनी दिएका थिए । उनले आफूहरुले आफ्नो बास्तविक तागत देखाउन बाँकी नै रहेको समेत बताए ।
