काठमाडौं । प्रधानन्याधीश चोलेन्द्र शम्सेर जबराको राजीनामा माग्दै आन्दोलनरत कानून व्यवसायीहरु र प्रहरीबीच सर्वोच्च अदालत परिसरमा घम्साघम्सी भएको छ । केही दिनदेखि कानून व्यवसायीहरुले सर्वोच्च अदालत गेटमा धर्ना दिइरहेका छन् ।
बिहीबार कानून व्यवसायीहरु सर्वोच्च अदालतको गेटभन्दा अगाडि बढ्न खोजेपछि प्रहरीले रोक्न खोज्दा झडप भएको हो । प्रहरी र वकिलहरुबीच धकेलाधकेल भइरहेको छ । प्रहरीले अगाडि नबढ्न भनेको छ भने वकिलहरुले प्रधानन्यायाधीश र प्रहरीविरुद्ध चर्को नारबाजी गरेका थिए ।
आजको प्रदर्शनमा प्रहरी र कानून व्यवसायीहरुबीच धकेलाधकेल हुँदा नेपाल बार एशोसिएसनका अध्यक्ष चण्डेश्वर श्रेष्ठसहित १२ जना घाइते भएका छन् । प्रधानन्यायाधीश जबरा प्रवेश गर्ने वैकल्पिक गेटसम्म पुग्न खोज्ने कानून व्यवसायीहरुलाई रोक्ने क्रममा प्रहरीले बल प्रयोग गर्दा उनीहरु घाइते भएका हुन् ।
प्रहरीले उनीहरुलाई मूल गेट अगाडि नै रोकेको छ । वैकल्पिक गेटसम्म पुग्ने प्रयास सफल हुन नसकेपछि उनीहरु मूल गेटबाटै फर्किएका छन् । सर्वोच्च अदालत परिसरभित्र आजको विरोध प्रदर्शन सकिएको छ ।
सर्वोच्च अदालत परिसरमा बिहीबार प्रदर्शनमा उत्रिएका कानून व्यवसायीहरुमाथि प्रहरीले बिहीबार बल प्रयोग गरेको छ । बल प्रयोगबाट घाइते भएका बार अध्यक्ष श्रेष्ठलाई अस्पताल उपचार भइरहेको छ । उनको छातीमा चोट लागेको बताइएको छ ।
त्यसैगरी अधिवक्ताहरु प्रकाश महर्जन, कपिल पोखरेल, रमण कर्ण, युवराज भण्डारी, गोपाल सापकोटा, ऋषिराम घिमिरे लगायत घाइते भएका छन् ।
सर्वोच्च अदालतका मुख्य रजिष्ट्रार लालबहादुर कुँवरले दमन गर्न प्रहरी परिचालन गरेको भन्दै कानुन व्यवसायीहरुले विरोध गरेका छन् ।
