काठमाडौं । कर्णालीले स्वास्थ्य क्षेत्रका दक्ष जनशक्ति तयार गर्ने सपना पूरा लागेको छ । त्यही सपनाका साथ स्थापना भएको कर्णाली स्वास्थ्य विज्ञान प्रतिष्ठानमा एमबीबीएसलगायतका कक्षा संचालन मंसिरबाट सुरु हुँदैछन् ।
लामो समयको प्रयास र प्रतिक्षपछि मङ्सिर १९ गतेदेखि एमबीबीएसलगायतका शैक्षिक कक्षा सञ्चालन हुन लागेका हुन् । प्रतिष्ठानका अनुसार लक्ष्य तथा उद्देश्यअनुरुप सञ्चालित स्वास्थ्य सेवा प्रवाह तथा प्राज्ञिक कार्यक्रमको सुरु गर्ने अन्तिम तयारी भइरहेको छ ।
प्रतिष्ठानका शिक्षाध्यक्ष डा निरेश थापाका अनुसार एमबीबीएस, एमडी, एमएस, बिएनस, बिएमएस, बिपिएच र बिफर्मा निर्धारित समयमै सुरु हुनेछन् । यसका लागि चिकित्सा शिक्षा आयोगको यही कात्तिक २५ गते सूचना प्रकाशित गरिसकेको छ । मङ्सिर १९ गतेदेखि कक्षा सञ्चालनको लागि अहिले भर्ना चलिरहेको छ ।
शुक्रबार गरिएको पत्रकार भेटघाटमा दिएको जानकारीअनुसार एमबीबीएस २० सीटमध्ये १५ जना भर्ना भइसकेको र पाँच सिट प्रक्रियामा छन् । एमबीबीएस २० सीटसहित अन्य ९० वटा सिटमा ६० सीट भर्ना भइसकेका छन् ।
यसैबीच स्वास्थ्य मन्त्रालयले उपकुलपति डा मङ्गल रावल र रजिष्ट्रार नृपेन्द्र महतलाई काम काज रोक्ने निर्णय गरेपछि केही अन्योलता छाएको छ । पूर्वनिर्धारित कार्यक्रम संचालनमा केही समस्या आउने प्रतिष्ठानकै कर्मचारी बताउँछन् ।
मन्त्रालयले निमित्त उपकुलपति डा. निरेश थापालाई जिम्मा दिएको छ ।
