धनगढी । सुदूरपश्चिमका मुख्यमन्त्री त्रिलोचन भट्टलाई विश्वासको मत नदिने नेकपा (एमाले) ओली समूहका सांसदलाई स्पष्टीकरण सोधिएको छ । एमालेको प्रदेशसभा दलले लगाएको ह्वीप उलंघन गरेको भन्दै स्पष्टीकरण सोधेको हो ।
एमाले प्रदेशसभा दलका नेता प्रकाश बहादुर शाहले मुख्यमन्त्री भट्टलाई मत नदिने ७ जना सांसदलाई स्पष्टीकरण सोधेका छन् । शाहले प्रदेशसभा सदस्यहरु पठानसिंह बोहरा, लिलाधार भट्ट, रतन थापा, माया तामाङ, ग्याल्बु बोहरा, नेपाल चौधरी र बलदेव रेग्मीलाई मत नदिनुको कारण २४ घण्टाभित्र दिन भनेका छन् बुधबार दिउँसो ५ बजेभित्र स्पष्टीकरण नदिए वा चित्तबुझ्दो नभए दलको विधान अनुसार कारबाही गर्ने चेतावनी दिएका छन् । दलका बैठक बसेर मुख्यमन्त्री भट्टले विश्वासको मत लिने निर्णय गरेको थियो ।
एमालेको स्थायी समिति बैठकपछि अध्यक्ष केपी ओलीले सरकारलाई दिएको समर्थन फिर्ता लिएको निर्णय गर्दै सरकारमा सहभागी मन्त्रीलाई फिर्ता बोलाएका थिए । तर, प्रदेशसभामा नेता माधव कुमार नेपाल समूहले बहुमतले समर्थन फिर्ता नलिने निर्णय गरेको थियो । उक्त निर्णयसँगै मन्त्रिमण्डल हेरफेर गरिएको थियो ।
पहिला तीन मन्त्री सहभागी थिए भने पछि चार मन्त्री र तीन राज्यमन्त्री सरकारमा सहभागी भए । त्यसपछि एमालेको सुदूरपश्चिममा पनि विवाद उत्कर्षमा पुगेको थियो ।
आज एमालेको ओली समूहले पार्टी ह्वीप लगाउँदै मुख्यमन्त्री भट्टको विपक्षमा मतदान गर्न ह्वीप लगाएको थियो । तर, त्यसलाई दलले अस्वीकार गर्दै विश्वासको मत दियो । ओली समूहले पार्टी ह्वीप उलंघन गर्ने सांसदलाई कारवाही गर्ने बताइसकेको छ । फेरि दलका नेताले ओली समूहका सांसदलाई स्पष्टीकरण सोधेको छ । यसले पनि एमालेको विवाद झन चर्किने भएको छ ।
