काठमाडौं । अमेरिकाका नवनिर्वाचित राष्ट्रपति जो बाइडनले पदभार ग्रहण नगर्दै चीनविरुद्ध अभिव्यक्ति दिन थालेका छन् । उनले अमेरिका र उसका सहयोगी देशहरुले चीनको प्रभावविरुद्ध मिलेर लड्नु पर्ने बताएका छन् । चीनको नेतृत्वमा विश्वकै ठूलो एसियाली व्यापार सम्झौता (आरसीईपी) मा हस्ताक्षर भएपछि बाइडनको सो अभिव्यक्ति आएको हो ।
चीनको अगुवाईमा १५ देशहरुको सहभागीतमा आरसीईपी सम्झौता भएको थियो । ठूलो अर्थतन्त्र भएका अमेरिका र भारत भने सो सम्झौतामा सहभागी छैनन् । सहभागी देशहरुले भारत र अमेरिकालाई पनि सहभागी हुन सुझाव दिइरहेका छन् । तर, बाइडनले आरसीईपीमा सहभागी हुने नहुने बारे केही बोलेका छैनन् । आफू अझै कार्यालयभन्दा बाहिर रहेको र आफूले अमेरिकाको व्यापारिक नीतिको विषयमा सल्लाह गर्न बाँकी रहेको प्रतिक्रिया दिए ।
समाचार एजेन्सीहरुका अनुसार बाइडनले अहिले अमेरिकाले समग्र विश्वको कुल ग्रार्हस्थ उत्पादन (जीडीपी) को २५ प्रतिशतको हिस्सा बनाएको र थप २५ प्रतिशत वा सोभन्दा धेरै अर्थतन्त्र भएका प्रजातान्त्रिक मुलुकहरुसँग सहकार्य गरी नीति निर्माण गर्नु जरुरी रहेको बताए ।
आइतबार भियतनामको हानोईमा भएको सम्मेलनमा विभिन्न १५ मुलुकहरुले आरसीईपी सम्झौतामा हस्ताक्षर गरेका थिए । यो सम्झौतामा सहभागी मुलुकहरुले समग्र विश्वको ३० प्रतिशतको जीडीपीको हिस्सा ओगट्छन् । पहिलोपटक चीन, जापान र दक्षिण कोरिया एउटै सम्झौतामा आबद्ध भएका हुन् ।
यसैबीच चीनले भने बाइडनको कार्यकालमा चीन–अमेरिका सम्बन्धमा सुधार हुने विश्वास लिएको छ । मंगलबार चिनियाँ सुरक्षा नियामकका शीर्ष अधिकारीले यस्तो विश्वास व्यक्त गरेका हुन् । चाइना सेक्युरिटिज रेगुलारिटी कमिसनका उपाध्यक्ष फाङ सिघाईले चार वर्षको कार्यकालमा दुई मुलुकको सम्बन्धको अहिलेको तुलनामा निकै राम्रो बन्ने बताएका हुन् ।
तर, बाइडनका चुनावदेखि विजयी पछिको अभिव्यक्तिले त्यो कुनै संकेत गर्दैन । चुनावी अभियानको क्रममा गरिएका सम्बोधनको क्रममा बाइडनले चीन, रुस र उत्तर कोरियाका नेताहरुलाई ‘ठग’ को संज्ञा दिँदै कुनै सम्बन्ध नहुने बताएका थिए ।
