News Portal

  • किसानलाई मल उपलब्ध नगराउने अधिकारी र कोइरालालाई कारवाही, कम्पनी कालो सूचीमा

    डबली संवाददाता२०७७ भदौ २२ गते
    ३५१ पटक

    काठमाडौँ । किसानलाई समयमै मल उपलब्ध नगराउने दुई ठेकेदारलाई सरकारले कारवाही गरेको छ । मल आपूर्तिको ठेक्का लिएका कम्पनीहरुले गरेको लापर्वाहीलाई कारबाही गर्दै सरकारले धरौटी समेत जफल गरेको ।

    सम्झौता समयभित्र मल नल्याउने ठेकेदार शारदाप्रसाद अधिकारीको शैलुङ इन्टरप्राइजेज र हुमनाथ कोइरालाको हानोको मल्टिप्रपोज कम्पनीसँगको ठेक्का सम्झौता सरकारले रद्द गर्नुको साथै धरौटी जफत गरेको हो ।

    सरकारले कृषि सामाग्री लिमिटेडमार्फत युरिया मल आयात गर्न गत अप्रिल २४ र २७ मा ५० हजार मेट्रिय टन युरिया मल आयातका लागि शारदाप्रसाद अधिकारीको सैलुङ इन्टरप्राइजेज र हुमनाथ कोइरालाको होनिको मल्टिपल प्रालिसँग सम्झौता गरेको थियो । तर, सम्झौताअनुसार समय सीमा पूरा भइसक्दा पनि ल्याउन नसकेकाले कृषि सामग्री केन्द्रले कारबाहीको निर्णय गरेको हो । यी दुई कम्पनीले २५–२५ हजार मेट्रिकटन मल ल्याउने ठेक्का लिएका थिए । तर हालसम्म पनि उनीहरुले मल नल्याइदिँदा देशभर मलको हाहाकार भएको छ ।

    दुबै सप्लायर्सले मल आयातका लागि १२ मेमा नेपाल इन्भेस्टमेन्ट बैंक र सिद्धार्थ बैंकमा प्रतिकपत्र खोलेका थिए । प्रतितपत्र खोलेको मितिले पहिलो शिपमेन्ट ४२ दिन र दोस्रो सिपमेन्ट ७२ दिनभित्र गरी सम्पूर्ण सामान भदौ ७ भित्रै शिपमेन्ट भइसक्नु पर्ने थियो । तर समयमा सामान नल्याएपछि पुनः २५ दिन म्याद थप गरिएकोमा सो मितिमा पनि शिपमेन्ट नभएको केन्द्रले जनाएको छ ।

    भदौ २० गतेभित्र सम्झौताअनुसार मल ल्याइसक्नुपर्ने थियो । केन्द्रले भदौ २१ गते अर्थात हिजो सम्झौताअनुसार मल ल्याउन सक्ने कुनै बस्तुगत एवम् विश्वसनीय तथ्य प्रमाणहरु प्राप्त नभएकाले दुबै ठेकेदारलाई कारवाही गरिएको र दुबै कम्पनीको नाममा राखेको कार्यसम्पादन जमानत जफत गरी सम्झौता रद्ध गरिएको जानकारी केन्द्रले कृषि मन्त्रालयलाई गराएको छ ।

    साथै, केन्द्रले प्रचलित कानुन अनुसार सप्लार्यसँग क्षतिपूर्ति दावी गरिने जनाएको छ । दुबै कम्पनीलाई कालोसूचीमा राख्ने प्रक्रिया समेत अघि बढाइने केन्द्रले जनाएको छ ।

    फरक–फरक ठेक्कामार्फत ५० हजार मेट्रिक टन युरिया मल ल्याउनका लागि पुस २८ र माघ ४ मा गरिएको टेण्डरमा दुई कम्पनीले ठेक्का पाएका थिए । दुवै कम्पनीले गरेको ठेक्का सम्झौताअनुसार साउन १० गतेसम्म पहिलो लट तथा भदौ २० भित्र सबै मल ल्याइसक्नुपर्ने थियो ।

    प्रतिकृया दिनुहोस्