काठमाडांै । जिल्ला प्रशासन कार्यालय सुनसरीले संक्रमितको संख्या थपिने क्रम नरोकिए पछि निषेधित क्षेत्र घोषणा गरेको छ । कोरोना संक्रमणको जोखिम थप बढ्दै गएको र बढ्दो जोखिम कम गर्न तथा भीडभाड रोक्न आवश्यक भएको निष्कर्षसहित निषेधित क्षेत्र घोषणा गरेको हो ।
जिल्लालाई साउन २६ गते सम्मका लागि निषेधित क्षेत्र लागू गरेको छ । प्रशासनले जारी गरेको निषेधित क्षेत्र आज राति १२ बजेदेखि २६ गते रातिसम्म लागू हुने भनिएको छ । त्यस्तै निर्णय उल्लंघन गर्ने र अटेर गरी सवारी चलाउने तथा हिंडडुल गर्नेलाई पक्राउ गरी कारवाही गरिने समेत सुनसरी प्रशासनले जनाएको छ ।
स्वाब संकलनको दायरा बढाउँदै जाँदा संक्रमितको संख्या समेत थपिने क्रम बढेकाले सुरक्षात्मक उपाय अपनाउन निषेधित क्षेत्र घोषणा गरिएको प्रमुख जिल्ला अधिकारी फणिन्द्रमणि पोखरेलले बताएको छन् ।
निषेधित क्षेत्रको अवधिमा सर्वसाधारणको आवतजावत पूर्ण बन्देज रहने जिल्ला प्रशासन कार्यालय सुनसरीले बताएको छ । सरकारी तथा सार्वजनिक संस्थाका कर्मचारी तथा अत्यावश्यक सेवाका कर्मचारीले भने आफुले प्रयोग गर्ने सवारी साधन सहित कार्यालय समय अघि र पछि आउजाउ गर्न पाउने छन् । औद्योगिक क्षेत्रलाई स्वास्थ्य सावधानी अपनाउनु पर्ने बताइएको छ ।
यो अवधिमा अत्यावश्यक, ढुवानी र निर्माण सामग्री बोकेका सवारी साधन बाहेक अन्य चलाउन पाइने छैन् । प्रशासनले सवारी सञ्चालनका लागि कुनैपनि पास जारी नहुने समेत स्पष्ट पारेको छ ।
