काठमाडौँ । कोरोना भाइरसको संक्रमणबाट पहिलो पटक बहालवाला मन्त्रीको मृत्यु भएको छ । यो घटना अफ्रिकी मुलुक नाइजरका हो ।
नाइजरका श्रम तथा रोजगार मन्त्री मोहमद बेन ओमारको कोरोना कारण मृत्यु भएको सरकारी टेलिभिजनले घोषणा गरेको छ ।
सत्तारुढ पिएसडीका नेता समेत रहेका ५५ वर्षीय बेन ओमारको उपचारको क्रममा आइतबार निधन भएको जनाइएको छ ।
अन्तर्राष्ट्रिय संचारमाध्यमहरुका अनुसार मृत्युको समाचार प्रशारण गर्नुअघि सरकारी टेलिभिजनले मन्त्री बेन ओमारले कोरोनाभाइरसका बारेमा व्यक्त गरेका सन्देशहरु प्रशारण गरेको थियो । सन्देशमा मन्त्री ओमारले कोरोनाभाइरस निकै खतरनाक र घातक रहेको तथा यो प्रकाशको गतिमा तिब्र रुपमा फैलिने स्वभावको रहेको बताएका थिए ।
यसैबीच नाइजरका राष्ट्रपति मोहमदु इसोफुले बेन ओमारको निधनबाट आफू अत्यन्त दुखित भएको बताएका छन् । सम्भवतः कोरोनाबाट मृत्यु हुनेमा बेन ओमार विश्वकै पहिलो मन्त्री हुन् ।
अहिलेसम्म नाइजरमा हालसम्म ७ सय ५५ जनामा कोराना संक्रमित भएका छन् भने ३७ जनाको मृत्यु भएको छ ।
नाइजरमा आपतकालीन स्थितिको घोषणा गर्नुका साथै सीमा, धार्मिक स्थल तथा विद्यालयहरु सबै बन्द गरिएका छन् । साथै राजधानी नियामेलाई देशका अन्य भागबाट अलग्याइएको छ ।
