काठमाडौं । नेपाल र चीनबीच आपसीहित तथा सहयोगबारे उच्चस्तरमा प्रतिनिधिमण्डलस्तरीय छलफल भइरहेको छ ।
चीनका राष्ट्रपति सी चिनफिङ र प्रधानमन्त्री केपी ओलीले आ-आफ्नो मुलुकको प्रतिनिधित्व गरेका छन् । छलफलमा नेपाल-चीन सम्बन्धका सबै पक्षमा केन्द्रित रहेर विचार-विमर्श भइरहेको परराष्ट्र मन्त्रालयले जनाएको छ ।
प्रधानमन्त्री ओली नेतृत्वको वार्तामा अर्थ, परराष्ट्र, गृह, ऊर्जा, जलस्रोत तथा सिँचाइ, संस्कृति पर्यटन तथा नागरिक उड्डयन मन्त्रालयका उच्च अधिकारी सहभागी हुनुहुन्छ । राष्ट्रपति सी नेतृत्वको प्रतिनिधिमण्डलमा विदेशमन्त्री वाङ् यी, नेपालका लागि चिनियाँ राजदूत हउ यान्छी लगायत छन् ।
छलफलपछि राष्ट्रपति सी र प्रधानमन्त्री ओलीको समुपस्थितिमा दुईपक्षीय सम्झौता तथा एक दर्जनभन्दा बढी समझदारी पत्रमा हस्ताक्षर हुने कार्यक्रम रहेको छ ।
राष्ट्रपति विद्यादेवी भण्डारीको मैत्रीपूर्ण निमन्त्रणामा जनवादी गणतन्त्र चीनका राष्ट्रपति सी शनिबार अपराह्नदेखि नेपालको दुई दिवसीय राजकीय भ्रमणमा छन् । २३ वर्षपछि चिनियाँ राष्ट्रपतिबाट नेपालको राजकीय भ्रमण भएको हो ।
