काठमाडौं । प्रधानमन्त्री प्रचण्ड र नेपाल भ्रमणमा आएका कतारका राजा शेख तमिम बिन हमाद अल थानी आज भेटवार्ता हुँदै छ ।
होटल सोल्टीमा हुन लागेको भेटवार्तामा द्विपक्षीय सम्झौता र समझदारीबारे छलफल हुनेछ ।
परराष्ट्र मन्त्रालयका प्रवक्ता अमृतबहादुर राईका अनुसार कतारसँग ६ वटा सम्झौतामा हस्ताक्षर हुनेछ । नेपाल र कतारको सरकारी समाचार एजेन्सी, महान्याधिवक्ताको कार्यालय र इन्स्टिच्युट अफ फरेन अफेयर्ससँग सम्बन्धित विषयमा तालिम र सहयोग आदान प्रदान सम्बन्धी हस्ताक्षर हुने कार्यक्रम छ ।
यसैगरी शिक्षा र संस्कृति आदान प्रदानसँग सम्बन्धित विषयमा पनि हस्ताक्षर गर्ने कार्यक्रम छ । नेपालले कतारलाई हात्ती उपहार दिने सम्झौतामा भने अन्तर्राष्ट्रिय कानुनको प्रक्रिया पूरा गरेर मात्रै पक्रिया अगाडि बढ्नेछ ।
आजको भेटवार्तामा प्रधानमन्त्री प्रचण्डले हात्ति उपहार दिने घोषणा गर्ने तर सम्झौतामा हस्ताक्षर नगर्ने प्रधानमन्त्रीको कार्यालयले जनाएको छ ।
होटल सोल्टीको कार्यक्रमपछि प्रधानमन्त्री प्रचण्डले होटल द्वारिकामा आयोजना गरेको दिवा भोजमा कतारको राजासहितको टोली सहभागी हुनेछ । त्यसपछि कतारी टोली आजै दिउँसो नेपालबाट फर्किने कार्यक्रम छ ।
राष्ट्रपति रामचन्द्र पौडेलको निमन्त्रणामा दुईदिने राजकीय भ्रमणका लागि कतारका राजा भ्रमण दलका सदस्यहरुसहित मंगलबार काठमाडौं आएका थिए ।