काठमाण्डौ। सरकारले आज र भोलि बालबालिकालाई राष्ट्रिय भिटामिन ‘ए’ कार्यक्रम सञ्चालन गर्दैछ । भिटामिन ‘ए’ क्याप्सुल छ महिनादेखि ५९ महिनाका बालबालिका तथा जुकाको औषधि एक वर्षदेखि पाँच वर्षसम्मका बालबालिकालाई खुवाउन लागिएको हो ।
झण्डै ३२ लाख बालबालिकालाइ भिटामिन ‘ए’ र झण्डै २९ लाख बालबालिकालाई जुकाको औषधि खुवाइने लक्ष्य रहेको स्वास्थ्य तथा जनसँख्या मन्त्रालय, स्वास्थ्य सेवा विभागले जनाएकोछ ।
सरकारले बालबालिकामा हुन सक्ने स्वास्थ्य जटिलता तथा कुपोषणको जोखिम न्यूनीकरण गर्नका लागि २०५० सालदेखि भिटामिन ‘ए’ क्याप्सुल र २०५६ सालदेखि जुकाको औषधि नियमित खुवाउन थालेको हो । ‘राष्ट्रिय भिटामिन ‘ए’ कार्यक्रमसँगै आज र भोलि यसअघि खोप लगाउन छुटेका बालबालिका खोप पनि लगाइने छ ।