हेटौंडा । बागमती प्रदेश टिम हेटौंडामा जारी अन्तर प्रदेश राष्ट्रिय खेलकुद २०८० पुरुष फुटबल प्रतियोगिताको फाइनलमा प्रवेश गरेको छ ।

हेटौंडा–६ स्थित गौरीटार बहुउद्देश्यीय रंगशालामा जारी प्रतियोगिताअन्तर्गत बिहीबार बागमती र कर्णाली प्रदेशबीचको खेलको निर्धारित समय गोलरहित बराबरीमा सकिएपछि निर्णय पेनाल्टी सुटआउटबाट भएको हो ।

बागमतीसँग पेनाल्टी सुटआउटमा ६–५ गोल अन्तरले पराजित भएपछि कर्णाली प्रदेश बाहिरिएको हो ।

पेनाल्टीमा बागमती प्रदेशका सुरज विष्ट, बिशोव लामा, छिरिङ लामा, ललित चौलागाईं र प्रीतम स्याङ्बोले गोल गरे । रोशन दोङ र  समुएल सुनार भने पेनाल्टीमा चुके ।

कर्णाली प्रदेशका अनिश परियार, किरण रावत, अभिषेक बम, सनम आचार्य र सुवास बमले गोल गरे । रितेश श्रेष्ठ, हेमन्त गुरुङ र गद्नेश मगरका प्रहार असफल भए ।

अब बागमतीले उपाधिका लागि आगामी आइतबार कोशी प्रदेश टिमसँग खेल्ने भएको छ । बागमती प्रदेश खेलकुद विकास समितिको आयोजना एवं बागमती प्रदेश सामाजिक विकास मन्त्रालयको व्यवस्थापनमा प्रतियोगिता भएको हो ।