अनलाइन डबली
काठमाडौं । एनआरटी हेटौंडामा जारी छैठौं संस्करणको सहिद स्मृति स्थानीय तह अन्तर्राष्ट्रिय फुटबल प्रतियोगिता–२०८० को सेमिफाइनलमा प्रवेश गरेको छ ।
लिग च्याम्पियन चर्च व्वाइजमाथि टाइब्रेकरमा ४–३ गोलअन्तरको नाटकीय जीत दर्ता गराउँदै एनआरटी अन्तिम चारमा स्थान बनाउने पहिलो टोली बनेको हो ।
निर्धारित समय २–२ गोलको बराबरीमा टुंगिएपछि खेलको नतीजाका लागि टाइब्रेकरको सहारा लिइएको थियो ।
हेटौंडा–६ स्थित गौरीटाार रंगशालामा भएको टाइब्रेकरमा विजयी टोली एनआरटीको तर्फबाट अभिषेक लिम्बु, जय गुरुङ, प्रिसो र विवेक गुरुङले गोल गरेका थिए ।
एनआरटीका मोहितको गुरुङको प्रहार विपक्षीका गोलरक्षक रेम्बो चौधरीले बचाएका थिए ।
चर्च व्वाइजको तर्फबाट निरज कार्की, बिकु राई, कमल श्रेष्ठको प्रहार गोलमा परिणत भएको थियो ।
चर्च व्वाइजका विदेशी खेलाडी बाउण्डोमाको प्रहार बाहिरिँदा र लक्षु थापाको प्रहार एनआरटीका गोलरक्षक प्रिसोले रोकेका थिए ।
दुई गोलले पछाडि परेको अवस्थामा एनआरटीले निर्धारित समय ९० मिनेट र अतिरिक्त समयको चौथो मिनेटमा गोल गर्दै खेललाई बराबरीमा ल्याएको थियो ।
चर्च व्वाइजको तर्फबाट खेलको ५४ औं मिनेटमा राजेश परियार र ७६ औं मिनेटमा मार्टिनले गोल गरेका थिए ।
परियारले डिबक्स बाहिरबाट प्रहार गरेको बल उत्कृष्ट गोलमा परिणत भएको थियो । मार्टिन्सले मनिस जर्गामगरले उपलब्ध गराएको बलमा गोल गरेका थिए ।
खेलमा हारतर्फ अग्रसर भइरहेको अवस्थामा आक्रमक बनेको एनआरटीले ९० औं मिनेटमा अशोक थापाले ‘व्याक हिल’ गोल गर्दै टोलीमा उत्साह थपे ।
निर्धारित समयपश्चात् थप गरिएको चौथो मिनेटमा विदेशी खेलाडी ग्लोरीले गोल गर्दै एनआरटीलाई राहत दिए । उनका गोलसँगै खेल बराबरी भएको थियो ।
निर्धारित समयसँगै सिधै टाइब्रेकरबाट जीतहारको टुंगो लगाइएको हो ।
एनआरटीले अन्तिम चारमा धनकुटाको राजारानी र त्रिभुवन आर्मी क्लबबीचको विजेतासँग प्रतिस्पर्धा गर्नेछ ।
मकवानपुर जिल्ला फुटबल संघको आयोजनामा जारी प्रतियोगितामा शनिबार आयोजक मकवानपुर ११ र वाग्मती युथ क्लब सर्लाहीबीच खेल हुनेछ ।
