अनलाइन डबली
काठमाडौं । मौसम पूर्वानुमान महाशाखाका अनुसार हाल नेपालमा पश्चिमी वायुको प्रभाव रहेको छ । जसकारण बिहीबार पनि सुदूरपश्चिम, लुम्बिनी र कर्णाली प्रदेशलगायत देशका पहाडी भू-भागमा आंशिकदेखि साधारणतया बदली रही बाँकी भू–भागमा मौसम मुख्यतया सफा रहेको छ ।
रातिबाट सुदूरपश्चिम र कर्णाली प्रदेशका धेरै ठाउँहरु र लुम्बिनी प्रदेशका केही ठाउँहरुमा हल्का वर्षा भइरहेको छ भने उच्च जुम्ला, हुम्लालगायतका हिमाली क्षेत्रमा हिमपात भइरहेको छ ।
हिउँदे वर्षा र हिमपात सुरु भएपछि किसान खुशी भएका छन् । यो वर्ष हिउँ नपरी हिउँदे सिजन सकिन लागेको भन्दै किसानहरु चिन्तित थिए । हिमपात र वर्षा नहुँदा हिउँदे बाली सुक्न लागेको थियो ।
त्यसैगरी तराईमा लागेको हुस्सु कम हुँदै गएको छ । बिहीबार मध्य तथा पूर्वी तराईका थोरै स्थानहरुमामात्रै हुस्सु लागेको छ ।
बिहीबार दिउँसो गण्डकी, लुम्बिनी, कर्णाली र सुदूरपश्चिम प्रदेश लगायत देशका पहाडी भू–भागमा साधारणतया बदली रही बाँकी भू–भागमा आंशिक बदली देखि मुख्यतया सफा रहनेछ ।
गण्डकी, लुम्बिनी, कर्णाली र सुदूरपश्चिम प्रदेशका थोरै स्थानहरुका साथै बाँकी पहाडी भु–भागका एक दुई स्थानमा हल्का वर्षाको सम्भावना रहेको महाशाखाले जनाएको छ ।
