अनलाइन डबली
सुर्खेत । रामीडाँडा केन्द्र भएर गएको भूकम्पमा परी ज्यान गुमाउने १५७ जनामध्ये १२० जनाको शव आफन्तले बुझेका छन् । प्रहरीका अनुसार ३७ शव भने बुझाउन बाँकी रहेको छ । उनीहरुका आफन्तलाई सम्पर्कमा ल्याउन स्थानीय प्रशासनले प्रयास जारी राखेको छ ।
गृहमन्त्रालयका अनुसार शुक्रबार राति गएको भूकम्पमा परी जाजरकोटमा १०५ जनाको मृत्यु भएको छ भने १०६ जना घाइते भएका छन् । त्यसै गरी रुकुम पश्चिममा ५२ जनाको मृत्यु भएको छ भने १३२ जना घाइते भएका छन् ।
त्यसै गरी दैलेखमा ३ जना, जुम्लामा ३ जना, सल्यानमा २ जना, प्युठानमा ३ जना, बैतडीमा घाइते ३, रोल्पा र दाङमा एक एक जना गरी जम्मा २५४ जना घाइते भएका छन् ।
शव बुझेकाहरुले अन्त्येष्टीको तयारीमा लागेका छन् ।
भूकम्पका कारण भौतिक संरचनामा व्यापक क्षति भएको छ । सरकारले पीडितलाई लक्षित गरी विशेष राहत प्याकेजको घोषणा गर्न मन्त्रिपरिषद् बैठक जारी रहेको छ ।
