अनलाइन डबली
काठमाडौँ । गैरआवासीय नेपाली संघ (एनआरएनए) बद्री केसी समूहको चुनावमा धाँधली भएको छ । उक्त समूहको अध्यक्षमा बद्री केसी विजयी भएको घोषणा गरिएको छ । तर प्रतिस्पर्धी आरके शर्मा र महेश श्रेष्ठले धाधली भएको भन्दै मत परिणामलाई अस्वीकार गर्ने बताएका छन् ।
घोषणा गरिएको मत परिणामअनुसार बद्री केसीले १३७८, आरके शर्माले १२८१ र महेश श्रेष्ठले १२२५ मत प्राप्त गरेको देखाएको छ । यो फेक भएको भन्दै उनीहरुले आपत्ति जनाएका छन् ।
अध्यक्षका प्रत्यासी आरके शर्माले अनलाइन भोटिङ सिस्टम ह्याक गरी मत परिणाम उल्ट्याइएको बताए । उनले संघ शून्यमा गएको भन्दै परराष्ट्र मन्त्रालयको हस्तक्षेपपछि मात्र अगाडि बढ्ने बताए ।
त्यस्तै, अर्का अध्यक्षका प्रतिस्पर्धी श्रेष्ठले निर्वाचन रद्द गर्न माग गर्दै गम्भीर छानबिन र दोषीलाई कडा कारबाही हुनुपर्ने बताउँछन् । उनले निर्वाचित भनिएको नयाँ कार्यसमिति भंग गरेर नयाँ निर्वाचन गराउनुपर्ने बताए ।
पराजितले मात्रै होइन उपाध्यक्षमा जितेका खगेन्द्र न्यौपानेले पनि चुनावमा धाँधली भएको बताए । उनले आफूलाई निश्पक्ष देखाउन जिताइएको बताउँदै स्वीकार नगर्ने बताउँदै निष्पक्ष छानविनको माग समेत गरे ।
केसीले भेरो नामक अनलाइन सिस्टम नै ह्याक गरेर आफूलाई विजयी घोषणा गर्न लगाएको आरोप लागेसँगै निष्पक्ष निर्वाचनमाथि नै प्रश्न उठेको छ ।
सिस्टममै धाँधली भएको प्रमाण महासचिवका एक उम्मेदवार डा. केशव पौडेलको काठमाडौंबाट झरेको मत शून्य देखाइएको छ । जबकी उनलाई सबैभन्दा बढी मत खसेको दाबी गरिएको छ । काठमाडौंबाट ८०० भन्दा धेरैले मत खस्दा एक मत पनि नखस्नु भनेको धाँधली भएको नै भएको दाबी गरिएको छ ।
चुनाव जित्नेको लागि धाँधलीको आरोप अहिलेमात्रै हाेइन केसी उपाध्यक्ष र महासचिव हुँदादेखि नै उनलाई सूचनाप्रविधिको दुरुपयोग गरी महाधिवेशन प्रतिनिधिको डाटाबेस र मत परिणाममा चलखेल गरेको आरोप लाग्दै आएको थियो ।
केसीले महासचिवमा आफू निकट गौरीराज जोशी निर्वाचित गराएका छन् ।
