काठमाडौँ । राजस्व अनुसन्धान विभागले  विदेशी विनिमय अपचलन गरी अवैध कारोबार गरेको आरोपमा चार जना बिरुद्ध मुद्दा दर्ता गरेको छ । विभागले सिरहाको माडर बस्ने ४७ वर्षीय प्रेमकुमार यादव, त्यही ठाउँ बस्ने सञ्जयकुमार साह, पवनकुमार यादव र ४० वर्षीय अरुण यादवविरुद्ध विदेशी विनिमय अपचलन गरी अवैध कारोबार गरेको आरोपमा १५ करोड रुपैयाँभन्दा बढी बिगो कायम गरी आज  मुद्दा दर्ता गरेको हो ।

प्रहरीले गएको भदौ १५ गते सिरहा नगरपालिका–१५ कालीचौकमा भारतबाट नेपालतर्फ आउँदै गरेको बीआर ७ सी ४२२४ भारतीय नम्बरकाे कारलाई रोकी जाँच गर्ने क्रममा कारको चालक बस्नेतर्फको दुईवटा सिटमुनि एक हजार दरका तीन हजार चार सय थान थान ( ३४ लाख) र पाँच सय दरका दुई हजार थान ( १० लाख) फेला पारि राजस्व अनुसन्धान विभागमा बुझाएको थियो ।

विभागले गरेको सूक्ष्म अनुसन्धानमा आरोपी चारै जना समेतको मिलेमतोमा गैह्रकानुनी रूपमा इजाजत प्राप्त नगरि प्रेमकुमार यादवले भारतीय नागरिक राजकुमार पासवानबाट रकम लिने गरेको पाइएको हो ।

उनीहरुले विदेशी विनिमय (नियमित गर्ने) ऐन, २०१९ को दफा ९ ‘ग’ बमोजिमको कसुर गरेको पुष्टि हुन आएकाले त्यहीअनुसार आज मुद्दा चलाइएको विभागले जनाएको छ ।