अनलाइन डबली
काठमाडौं । शिक्षकपछि चिकित्सक पनि सडकमा निस्किएका छन् । पोखराको मणिपाल शिक्षण अस्पतालका चिकित्सकमाथि कुटपिटको विरोधमा काठमाडौंमा चिकित्सकहरुले प्रदर्शनमा उत्रिएका हुन् ।
ड्रेसमै माइतीघरमण्डलमा जम्मा भएका चिकित्सक नाराबाजी गर्दै वानेश्वरसम्म र्यालीको आयोजना गरेका हुन् । उनीहरुले भौतिक सुरक्षाको माग गर्दै आक्रमणकारीलाई कडा कारबाही गर्ने कानुन बनाउन पनि माग गरे ।
चिकित्सकहरुले दोषीलाई खुल्ला छुट, डाक्टरमाथि बुटैबुट, अस्पताल नआउ, डाक्टर र बिरामीको ज्यान बचाउ, डाक्टर कुट्न पाइँदैन, पेशा छोडौं कि देश छोडौं ? लगायतका नारा लगाइरहेका छन् । चिकित्सकको प्रदर्शनका क्रममा प्रहरीसँग धकेलाधकेल भएको थियो ।
मणिपाल शिक्षण अस्पतालमा उपचारको क्रममा मंगलबार लम्जुङकी एक महिलाको मृत्यु भएको थियो । मृतकका आफन्तसहितको भीडले डाक्टरले लापरवाही गरेको भन्दै हातपात गरेको थियो ।
