गलेश्वर । विगत २४ दिनदेखि बेपत्ता म्याग्दीका एक पुरुष अझै फेला परेका छैनन् ।
म्याग्दीको बेनी नगरपालिका–५ पुलाचौर स्थायी घर भई हाल काठमाडौँ महानगरपालिका–१६ वनस्थली बस्ने ५० वर्षीय हेमराज शर्माको अहिलेसम्म अत्तोपत्तो छैन ।
गत महिना असोज २६ गते आइतबार साँझ ४ बजेदेखि बेपत्ता भएका शर्माको खोजीकार्यमा अहिलेसम्म कुनै पनि प्रगति नभएको बेपत्ता भएका शर्माका आफन्त विवेक शर्माले बताए ।
सामाजिक एवं राजनीतिक गतिविधिमा सक्रिय शर्मा सबैका प्रिय थिए । एक्कासि सम्पर्कविहीन भएपछि परिवारका सदस्यले खोजी कार्यका लागि अपिल गरेका छन् ।
हालसम्म पनि फेला नपरेपछि सूचना दिनेलाई परिवारले नगद रु १० लाखसमेत पुरस्कार दिनेसमेत घोषणा गरेको छ ।
घर परिवारमा पनि कुनै झैझगडा मनमुटाव नभए पनि केही आत्तिएको जस्तो भने देखेको परिवारका सदस्यको भनाइ छ ।
परिवारका सदस्य, आफन्त, शुभचिन्तक र प्रहरीले काठमाडौँ आसपासका क्षेत्रमा नियमित जाने स्थान तथा वनजङ्गल, खोलानाला र देशका विभिन्न स्थानमा समेत व्यापक रूपमा खोजी गरिसकेका छन् ।
अहिलेसम्म कुनै सुराक फेला नपरेपछि परिवार चिन्तित भएका छन् । त्यसकारण उनिहरूले १० लाख नगद पुरस्कार दिनेसमेत घोषणा गरेका हुन् ।
