अनलाइन डबली
काठमाडौँ । निर्वाचन आयोगले आगामी मंसिर ४ गते हुने प्रतिनिधिसभा निर्वाचनका लागि खर्चको सीमा तोकेको छ । आयोगले निर्वाचनमा अस्वाभाविक भड्किलोपन प्रदर्शन नहोस् भनेर खर्चको सीमा तोकेको हो ।
आयोगले भूगोल र मतदाताको संख्याको आधारमा प्रतिउम्मेदवार २५ लाखदेखि ३३ लाख रुपैयाँसम्म खर्च गर्न पाउने गरी सीमा तोकेको छ ।
आयोगले तोकेको निर्वाचनको खर्च सीमाअनुसार प्रधानमन्त्री तथा नेपाली कांग्रेसका सभापति शेरबहादुर देउवाले निर्वाचनमा ३१ लाख रुपैयाँसम्म खर्च गर्न पाउनेछन् ।
प्रतिनिधिसभा सदस्यमा प्रत्यक्षतर्फ डडेलधुराबाट उम्मेदवार बनेका देउवाको निर्वाचन क्षेत्रमा ९१ हजार हाराहारी मतदाता छन् ।
यसैगरी, प्रमुख सत्ता साझेदार दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले २९ लाख रुपैयाँसम्म खर्च गर्न पाउने भएका छन् । आयोगका अनुसार गोरखा–२ का उम्मेदवारले २९ लाख रुपैयाँसम्म खर्च गर्न पाउने छन् । यस निर्वाचन क्षेत्रमा १ लाख ५ हजार मतदाता छन् ।
प्रमुख प्रतिपक्षी दल नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले निर्वाचनमा ३१ लाख रुपैयाँसम्म खर्च गर्न पाउने छन् ।
ओली झापा–५ बाट प्रतिनिधिसभाका लागि प्रत्यक्षतर्फको उम्मेदवार बन्दैछन् । आयोगले सो निर्वाचन क्षेत्रका क्षेत्रका उम्मेदवारले बढीमा ३१ लाख रुपैयाँसम्म खर्च गर्न पाउने सीमा तोकेको छ । यस निर्वाचन क्षेत्रमा १ लाख ५४ हजार मतदाता छन् ।
नेकपा एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपालले निर्वाचनको प्रचारप्रसारमा अधिकतम २९ लाख रुपैयाँसम्म खर्च गर्न पाउने छन् । रौतहट–१ बाट उम्मेदवार बनेका उनको निर्वाचन क्षेत्रमा १ लाख मतदाता छन् ।
इलाम–१ बाट उम्मेदवार बनेका एकीकृत समाजवादीका वरिष्ठ नेता तथा पूर्वप्रधानमन्त्री झलनाथ खनालले ३१ लाख रुपैयाँसम्म खर्च गर्न पाउने छन् ।
राष्ट्रिय प्रजातन्त्र पार्टीका अध्यक्ष राजेन्द्र लिङ्देनले ३१ लाख रुपैयाँसम्म खर्च गर्न पाउने छन् । उनको निर्वाचन क्षेत्र झापा–३ मा १ लाख ३१ हजार मतदाता छन् । यो निर्वाचन क्षेत्रमा नेपाली कांग्रेसका नेता कृष्णप्रसाद सिटौला समेत उम्मेदवार छन् ।
यसैगरी, लोकतान्त्रिक समाजवादी पार्टी नेपालका अध्यक्ष महन्थ ठाकुरले २९ लाख रुपैयाँ खर्च गर्न पाउनेछन् । महोत्तरी–३ बाट उम्मेदवार रहेका ठाकुरको निर्वाचन क्षेत्रमा १ लाख हाराहारीमा मतदाता छन् ।
