अनलाइन डबली
काठमाडौँ । युक्रेनका पूर्वी क्षेत्रमा भइरहेको जनमतसंग्रहको आज अन्तिम दिन । अन्तर्राष्ट्रिय संचारमाध्यमहरुका अनुसार आज पनि मतदान भइरहेको छ । कडा सुरक्षा व्यवस्थाबीच पाँच दिनसम्म मतदान चलेको थियो । भौतिक रुपमा मतदान उपस्थिति भएर वा टाढैबाट पनि मत व्यक्त गर्ने व्यवस्था मिलाइएको थियो । सुरक्षा कारण मतदान केन्द्रमा आउन नसक्ने वा आउन नचाहनेहरुलाई टाढैबाट मत व्यक्त गर्ने व्यवस्था मिलाइएको थियो ।
मतदान सकिएसँगै सर्वेक्षणका नतिजा पनि सार्वजनिक हुन थालेका छन् । रुसी संचारमाध्यमहरुका अनुसार पूर्वी क्षेत्रका चारवटै क्षेत्रमध्ये यसअघि अलग गणराज्य घोषणा भइसकेका लुहान्स्क र डोनेट्स्कमा सतप्रति मत रुससँग गाभिने पक्षमा खसेको छ । त्यस्तै, खेरसन र जापोरिजामा कतै ९५ प्रतिशतदेखि सतप्रतिसतसम्म मत खसेको रुसी संचारमाध्यमहरुले दाबी गरेका छन् ।
यो जनमतसंग्रहसँगै रुसको सैन्य कारवाही पूरा भएको बताइएको छ । रुसले युद्ध नभएर विशेष सैन्य कारवाही मात्रै गरेको बताउँदै आएको थियो । केही पहिले मात्रै रुसका राष्ट्रपति भ्लादिमिर पुटिनले आफ्नो सानो टुकुडीले मात्रै युक्रेनमा लडिरहेको बताउँदै पूर्ण क्षमताको कारवाही गर्न बाँकी रहेको बताएका थिए ।
रुसले युक्रेनमा सैन्य कारवाहीको गर्नुको पहिलो उद्देश्य नेटोको सदस्य हुनबाट रोक्नु थियो । त्यो पूरा भएको बताइएको छ । त्यस्तै, युक्रेनलाई निशस्त्रीकरण गर्ने, पूर्वी क्षेत्रका रुसीभाषिमाथिको युक्रेनी दमन रोक्नु, युक्रेनसँग छुटिने नारासहित लुहान्स्क र डोनेट्स्कका नागरिकको अधिकार सुरक्षित गर्नु थियो ।
रुसको अर्को उद्देश्य क्रिमियासँग आवत जावतलाई सहज गर्न भूगोल जोड्नु थियो । यो मारियोपोल कब्जासँग पूरा भएको बताइएको छ । खेरसनबाट यो क्षेत्रका लागि पानी आपूर्ती हुने भएको छ । रुसले आफ्नो पहिलो उद्देश्य पूरा गरेको पश्चिमा विश्लेषकहरुले नै बताउन थालेका छन् । भारतीय परराष्ट्रविज्ञ दीपक बोहराले समेत रुसले आफ्नो उद्देश्य पूरा गर्दै गएको बताए । उनले रुस यति पूरा भएपछि फर्किन्छ वा दोस्रो चरणको कारवाहीको लागि अघि बढ्छ, त्यो केही दिनमा देखिने बताए । रुसले अब युद्धको घोषणा गर्न सक्ने बोहराको अनुमान छ ।
रुसले सुरक्षित गर्ने चाहेका क्षेत्रमा जनमत गरेसँगै नयाँ युक्रेनसँग नयाँ स्तरको युद्धको घोषणा हुन सक्ने बताइएको छ । रुसले युक्रेन कब्जा गर्ने उद्देश्य नभएको समेत बताउँदै आएको थियो । तर पश्चिमा देशहरुले अस्त्र र लडाकु पठाएपछि रुस अब त्यसै नफर्किने समेत विश्लेषकहरु बताउँछन् ।
