काठमाडौं । साताको अन्तिम दिन (बिहिबार) नेपाल स्टक एक्सचेञ्ज (नेप्से) सामान्य अंकको गिरावट आएको छ ।आज नेप्से १.८० अंकले घटेर २ हजार ९ सय ४४ दशमलब ७८ विन्दुमा थामिएको छ ।
बिहीवार २२० कम्पनीको १ लाख ५५ हजार ६९० पटकको व्यापारमा रू. १६ अर्ब १० करोड ४ लाख माथिको कारोबार भएको छ ।
सामान्य अंकले घटेको बजारमा जलविद्युत् समूहका लगानीकर्ताहरुले सर्वाधिक कमाएका छन् भने कारोबारको आधारमा आज हाइड्रो इलेक्ट्रिसिटि इन्भेष्टमेण्ट एण्ड डेभलपमेण्ट कम्पनी उच्च स्थानमा रहेको छ । यस दिन जलविद्युत् समूहको परिसूचक सर्वाधिक ८८ दशमलव ६५ अर्थात् २ दशमलव ९९ प्रतिशतले बढेको हो ।
त्यस्तै, विकास बैंकको २ दशमलव ६३ प्रतिशत, वित्तको २ दशमलव ५७ प्रतिशत, लगानीको १ दशमलव शून्य ८ प्रतिशत, म्युचुअल फण्डको शून्य दशमलव ७९ प्रतिशत र लघुवित्तको शून्य दशमलव १४ प्रतिशत परिसूचक बढेको छ ।
आज १२ वटा कम्पनीको शेयरमूल्यमा उच्च बृद्धि भएको छ । यस दिन मूल्य वृद्धि हुने कम्पनीहरुमा लिवर्टी ईनर्जी कम्पनी, शिवश्री हाइड्रोपावर, ङादी ग्रुप पावर, माउन्टेन इनर्जी, रिडी हाइड्रोपावर, बरुण हाइड्रोपावर, सिइडिबी हाइड्रोपावर, अरुण भ्याली हाइड्रोपावर, जोशी हाइड्रोपावर, छ्याङदी हाइड्रोपावर, पोखरा फाइनान्स र अपी पावर कम्पनी रहेका छन् । साथै पाँचथर पावरको शेयरमूल्यमा पनि वृद्धि आएको छ ।
त्यस्तै, गोर्खाज फाइनान्सका लगानीकर्ताले सर्वाधिक गुमाएका छन् ।यस दिन कम्पनीको शेयरमूल्य ४ दशमलव २५ प्रतिशत घटेको छ । कम्पनीको शेयरमूल्य प्रतिकित्ता रू. ५९ ले घटेर अन्तिम मूल्य रू. १ हजार ३३० कायम भएको हो ।
