काठमाडौं । प्रधानमन्त्री तथा (नेकपा) का अध्यक्ष केपी शर्मा ओली शनिबार विहानै अर्का अध्यक्ष अध्यक्ष प्रचण्डलाई भेट्न खुमलटार पुगे । सरकारी गाडीमा सुरक्षासहित ओली प्रचण्डलाई भेट्न खुमलटार पुगेका छन् ।
प्रचण्डले आफू निकट नेताहरुको पेरिसडाँडामा गोप्य भेला गरेको भोलि विहानै ओली प्रचण्डलाई भेट्न तीन वर्षपछि पहिलो पटक खुमलटार पुगेका हुन् । ओली विहान ११ बजे खुमलटार पुगेका हुन् ।
ओली र प्रचण्डबीच एक घण्टा वार्ता भएको बताइएको छ । ओली १२ बजे खुमलटारबाट बाहिरिएका थिए । ओली र प्रचण्डबीच जारी स्थायी समिति बैठक, अध्यादेश र पेश गरिएका प्रस्तावबारे छलफल भएको स्रोतको दाबी छ । ओलीले आफू अध्यादेश फिर्ता लिन तयार रहेको जानकारी गराउँदै प्रचण्डले पेश गरेको प्रस्ताव पनि फिर्ता लिनु पर्ने सर्त राखेका थिए । तर प्रचण्डले अध्यादेश र आफूले पेश गरेको प्रस्ताव फरकफरक विषय भएको जवाफ फर्काएका थिए ।
त्यसैगरी ओलीले जारी स्थायी समिति बैठक केही दिन सार्न प्रस्ताव गरेका थिए भने प्रचण्डलाई गुटको भेला स्थगित गर्न सुझाव दिएका थिए । त्यसबारे सोच्न सकिने जवाफ प्रचण्डले फर्काएका थिए ।
ओली र प्रचण्डबीच वार्ता चलिरहेको बेला उपाध्यक्ष बामदेव गौतम पनि खुमलटार पुगेका थिए । त्यसको केही समयपछि वरिष्ठ नेता माधव कुमार नेपाल पनि खुमलटार पुगेका थिए । अहिले प्रचण्ड, नेपाल र गौतमबीच वार्ता चलिरहेको छ ।
खुमलटारमा आज भएको भेटवार्ताले जारी विवादलाई मत्थर पार्न सहयोग पुग्नेगरी नेताहरुबीच छलफल भएको (नेकपा) का नेताहरु बताउँछन् ।
