काठमाडौं । कोरोनाभाइरसबाट ज्यान गुमाउने पनि सबैभन्दा धेरै काठमाडौंमै छन् । देशभर १ हजार २३० जनाको ज्यान गुमाएकामध्ये ३०१ जना काठमाडौंका मात्रै छन् । कोरोनाबाट सबैभन्दा बढी प्रभावित भएको काठमाडौं उपत्यका अन्य दुई जिल्ला भक्तपुरमा ७५ र ललितपुरमा ८६ जनाले ज्यान गुमाएका छन् ।
स्वास्थ्य तथा जनसंख्या मन्त्रालयका अनुसार सोमबार काठमाडौं उपत्यकामा ५०१ जना कोरोनाबाट संक्रमित भएका छन् । योसँगै काठमाडौं उपत्यकामा कुल संक्रमित संख्या ९७ हजार १५९ पुगेको छ । जसमा काठमाडौंमा ७८ हजार ६५०, भक्तपुरमा ७ हजार १३० र ललितपुरमा ११ हजार ३७९ जना रहेका छन् ।
त्यसैगरी निको हुनेको संख्या पनि काठमाडौंमै धेरै छ । काठमाडौंमा ६४ हजार ७०, भक्तपुरमा ५ हजार ८६६ र ललितपुरमा ९ हजार ८९ जना निको भएर डिस्चार्ज भएका छन् । सोमबारसम्म काठमाडौंमा १४ हजार २७९, भक्तपुरमा १ हजार १८८ र ललितपुरमा २ हजार २०४ जना सक्रिय संक्रमित रहेका छन् ।
सोमबार देशभरका प्रयोगशालामा ४ हजार ८३२ नमुना परीक्षण गर्दा उनीहरुमा संक्रमण पुष्टि भएको थियो । सोमबार थपसहित कुल संक्रमितको संख्या २ लाख १० हनार ९७३ पुगेको छ । संक्रमितमध्ये १ लाख ७६ हजार ३६४ जना संक्रमणमुक्त भएका छन् ।
मन्त्रालयका अनुसार सोमबार थप २ हजार ९ सय ४३ जना क्रमणमुक्त भएर डिस्चार्ज भएका थिए । योसँगै कोरोनामुक्त हुनेको संख्या १ लाख ७६ हजार ३६४ पुगेको छ । सोमबारसम्म देशभर ३३ हजार ३७९ सक्रिय संक्रमित रहेको मन्त्रालयले जानकारी दिएको थियो ।
त्यसैगरी सोमबार थप ९ जना संक्रमितको ज्यान गएको थियो । योसँगै नेपालमा कोरोना भाइरस संक्रमणबाट ज्यान गुमाउनेको संख्या १ हजार २३० पुगेको थियो ।
मन्त्रालयका अनुसार सोमबारसम्म १ हजार १३ जना क्वारेन्टिनमा रहेका छन् भने संक्रमितमध्ये २८ हजार ३६० जना होम आइसोलेशनमा रहेका छन् । सोमबारसम्म मनाङ जिल्ला मात्रै कोरोना भाइरस संक्रमणमुक्त रहेको स्वास्थ्य मन्त्रालयले जनाएको छ ।
